AKP ភ្នំពេញ ថ្ងៃទី០៦ ខែមករា ឆ្នាំ២០២៦ -- សហភាពអឺរ៉ុបបាននិយាយកាលពីថ្ងៃចន្ទថា សកម្មភាពយោធារបស់សហរដ្ឋអាមេរិកថ្មីៗនេះនៅក្នុងប្រទេសវេណេស៊ុយអេឡា បានបង្កើតឱកាសសម្រាប់ការផ្លាស់ប្តូរប្រជាធិបតេយ្យដែលដឹកនាំដោយប្រជាជនវេណេស៊ុយអេឡា ខណៈដែលបានសង្កត់ធ្ងន់ទៅលើតម្រូវការក្នុងការគោរពច្បាប់អន្តរជាតិ និងជៀសវាងការកើនឡើងនៃភាពតានតឹងបន្ថែមទៀត។

ថ្លែងនៅក្នុងសន្និសីទសារព័ត៌មានថ្ងៃត្រង់មួយរបស់គណៈកម្មការអឺរ៉ុប អ្នកនាំពាក្យ លោកស្រី អានីតតា ហ៊ីបភ័រ (Anitta Hipper) បានបញ្ជាក់សារជាថ្មីថា ប្រធានាធិបតីវេណេស៊ុយអេឡា​ លោក នីកូឡាស់ ម៉ាឌូរ៉ូ (Nicolas Maduro) ខ្វះភាពស្របច្បាប់នៃមេដឹកនាំដែលត្រូវបានជ្រើសរើសដោយប្រជាធិបតេយ្យ ហើយលោកស្រីបានបន្ថែមថា ប្លុកនេះនៅតែបន្តតស៊ូមតិសម្រាប់ការផ្លាស់ប្តូរដោយសន្តិវិធីដែលដឹកនាំដោយវេណេស៊ុយអេឡាទៅកាន់លទ្ធិប្រជាធិបតេយ្យ។

លោកស្រីបាននិយាយថា «សហភាពអឺរ៉ុបកំពុងអំពាវនាវឱ្យមានភាពស្ងប់ស្ងាត់ និងការអត់ធ្មត់ដោយគ្រប់ភាគីទាំងអស់ ហើយក៏ដើម្បីជៀសវាងការកើនឡើងនៃភាពតានតឹង និងដើម្បីធានាបាននូវដំណោះស្រាយដោយសន្តិវិធីចំពោះវិបត្តិនេះ។ យើងក៏បានបញ្ចូលឯកសារយោងទៅលើតម្រូវការក្នុងការអនុលោម និងគោរពច្បាប់អន្តរជាតិផងដែរ»។

លោកស្រី ហ៊ីបភ័រ បានបន្ថែមថា សមាជិកនៃក្រុមប្រឹក្សាសន្តិសុខអង្គការសហប្រជាជាតិមានការទទួលខុសត្រូវជាពិសេសក្នុងការគាំទ្រច្បាប់អន្តរជាតិដែលជាសសរស្តម្ភនៃសន្តិសុខសកលលោក។

លោកស្រីបាននិយាយថា «ដោយសារព្រឹត្តិការណ៍ទើបតែកើតឡើង វាឆាប់ពេកក្នុងការពិនិត្យមើល និងវាយតម្លៃអំពីផលប៉ះពាល់ទាំងអស់ទាក់ទងនឹងការវាយតម្លៃផ្នែកច្បាប់... ចូរយើងធ្វើវាមួយជំហានម្តងៗ ហើយក៏ដើម្បីមើលថា តើការពិត និងព្រឹត្តិការណ៍កំពុងកើតឡើងយ៉ាងដូចម្តេច។ ឥឡូវនេះយើងស្ថិតនៅដំណាក់កាលដែលយើងបានឃើញមេដឹកនាំផ្តាច់ការ លោក ម៉ាឌូរ៉ូ ដែលខ្វះភាពស្របច្បាប់នៃមេដឹកនាំដែលត្រូវបានជ្រើសរើសតាមបែបប្រជាធិបតេយ្យ។ យើងបានបន្តក្នុងនាមជាសហភាពអឺរ៉ុបដើម្បីតស៊ូមតិសម្រាប់ការផ្លាស់ប្តូរដោយសន្តិវិធី ឆ្ពោះទៅរកលទ្ធិប្រជាធិបតេយ្យ ដែលដឹកនាំដោយប្រទេសវេណេស៊ុយអេឡា»៕

ដោយ៖ យា ចិន្ដាខន្ដី (ប្រភព៖ AA-AKP)