AKP ភ្នំពេញ ថ្ងៃទី០៥ ខែមករា ឆ្នាំ២០២៦ -- ក្រសួងការពារជាតិចក្រភពអង់គ្លេស បាននិយាយថា ចក្រភពអង់គ្លេស និងបារាំងបានធ្វើការវាយប្រហាររួមគ្នាទៅលើឃ្លាំងអាវុធក្រោមដីរបស់រដ្ឋអ៊ីស្លាមនៅក្នុងប្រទេសស៊ីរី។

ក្រសួងការពារជាតិចក្រភពអង់គ្លេសបាននិយាយថា «ការវិភាគស៊ើបការណ៍សម្ងាត់ដោយប្រុងប្រយ័ត្ន បានកំណត់អត្តសញ្ញាណកន្លែងក្រោមដីមួយនៅលើភ្នំចម្ងាយពីរបីម៉ាយល៍នៅភាគខាងជើងនៃទីតាំងបុរាណPalmyra។ កន្លែងនេះត្រូវបានកាន់កាប់ដោយក្រុម Daesh (រដ្ឋអ៊ីស្លាម) ដែលទំនងជាឃ្លាំងរក្សាទុកសព្វាវុធ និងគ្រឿងផ្ទុះ។ តំបន់ជុំវិញកន្លែងនេះគ្មានលំនៅដ្ឋានរបស់ជនស៊ីវិលទេ។ យន្តហោះ RAF Typhoon FGR4s ដោយមានការគាំទ្រពីនាវាដឹកប្រេង Voyager បានចូលរួមជាមួយយន្តហោះបារាំងក្នុងការវាយប្រហាររួមគ្នាទៅលើកន្លែងក្រោមដីនោះកាលពីល្ងាចថ្ងៃសៅរ៍ ទី០៣ ខែមករា ឆ្នាំ២០២៦»។

ក្រសួងនោះបាននិយាយបន្ថែមថា «យន្តហោះរបស់យើងបានប្រើគ្រាប់បែកនាំមុខប្រភេទ Paveway IV ដើម្បីកំណត់គោលដៅផ្លូវរូងក្រោមដីមួយចំនួនចុះទៅកន្លែងនោះ។ ខណៈដែលការវាយតម្លៃលម្អិតកំពុងដំណើរការ ការចង្អុលបង្ហាញដំបូងគឺថា គោលដៅត្រូវបានវាយប្រហារដោយជោគជ័យ។ មិនមានការចង្អុលបង្ហាញអំពីហានិភ័យណាមួយដែលត្រូវបានរកឃើញទៅលើជនស៊ីវិលដោយការវាយប្រហារនោះទេ ហើយយន្តហោះរបស់យើងទាំងអស់បានវិលត្រឡប់មកវិញដោយសុវត្ថិភាព»។

លោក ចន ហ៊ាលេយ (John Healey) រដ្ឋមន្ត្រីក្រសួងការពារជាតិបាននិយាយបន្ទាប់ពីការវាយប្រហារនោះថា «សកម្មភាពនេះបង្ហាញពីភាពជាអ្នកដឹកនាំរបស់យើងនៅចក្រភពអង់គ្លេស និងការប្តេជ្ញាចិត្តក្នុងការនៅជាមួយសម្ព័ន្ធមិត្តរបស់យើង ដើម្បីលុបបំបាត់ការលេចចេញជាថ្មីនៃក្រុម Daesh និងមនោគមវិជ្ជាដ៏គ្រោះថ្នាក់ និងអំពើហិង្សារបស់ពួកគេនៅមជ្ឈិមបូព៌ា។ប្រតិបត្តិការនេះ ដើម្បីលុបបំបាត់ភេរវករដ៏គ្រោះថ្នាក់ដែលគំរាមកំហែងដល់របៀបរស់នៅរបស់យើង បង្ហាញពីរបៀបដែលកងកម្លាំងប្រដាប់អាវុធរបស់យើងត្រៀមខ្លួនរួចជាស្រេចដើម្បីបោះជំហានទៅមុខពេញមួយឆ្នាំ ដោយរក្សាចក្រភពអង់គ្លេសឱ្យមានសុវត្ថិភាពនៅក្នុងប្រទេស និងមានភាពរឹងមាំនៅបរទេស»៕

ដោយ៖ យា ចិន្ដាខន្ដី (ប្រភព៖តាសស៍)