AKP ភ្នំពេញ ថ្ងៃទី០៥ ខែមករា ឆ្នាំ២០២៦ -- យ៉ាងហោចណាស់មនុស្ស៤០នាក់ រួមទាំងជនស៊ីវិលផងដែរបានស្លាប់បន្ទាប់ពីការវាយប្រហាររបស់សហរដ្ឋអាមេរិកទៅលើរដ្ឋធានីការ៉ាកាសរបស់ប្រទេសវេណេស៊ុយអេឡាកាលពីថ្ងៃសៅរ៍សប្តាហ៍មុន។ នេះបើយោងតាមការចុះផ្សាយរបស់កាសែតThe New York Times ដោយដកស្រង់សម្តីមន្ត្រីជាន់ខ្ពស់វេណេស៊ុយអេឡាម្នាក់។

រដ្ឋមន្ត្រីការបរទេសវេណេស៊ុយអេឡា លោក អ៊ីវ៉ាន់ ហ្គីល ពីនតូ (Yvan Gil Pinto) បាននិយាយកាលពីថ្ងៃទី០៣ ខែមករា ឆ្នាំ២០២៦ ថាសហរដ្ឋអាមេរិកបានវាយប្រហារទៅលើទីតាំងស៊ីវិល និងយោធានៅក្នុងទីក្រុងការ៉ាកាស។ លោកបានថ្កោលទោសចំពោះសកម្មភាពរបស់ទីក្រុងវ៉ាស៊ីនតោនថាជាការឈ្លានពានផ្នែកយោធា។ រដ្ឋបានដាក់ប្រទេសក្នុងគ្រាអាសន្ននៅក្នុងប្រទេសវេណេស៊ុយអេឡា។ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានបញ្ជាក់ពីការវាយប្រហារលើប្រទេសវេណេស៊ុយអេឡា។ យោងតាមមេដឹកនាំសហរដ្ឋអាមេរិក បានឱ្យដឹងថា ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ (Nicolas Maduro) និងភរិយារបស់លោកត្រូវបានចាប់ខ្លួននិងនាំចេញពីប្រទេស៕

ដោយ៖ យា ចិន្ដាខន្ដី (ប្រភព៖តាសស៍)