AKP ភ្នំពេញ ថ្ងៃទី០២ ខែមករា ឆ្នាំ២០២៦ -- ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បានដាក់ចេញផែនការឆ្លើយតប និងតម្រូវការមនុស្សធម៌ចំនួន ១,៧១ប៊ីលានដុល្លារអាម៉េរិកសម្រាប់ប្រទេសអាហ្វហ្គានីស្ថានក្នុងឆ្នាំ២០២៦ ដែលត្រូវបានគេរំពឹងថានឹងនៅតែជាវិបត្តិមនុស្សធម៌ដ៏ធំបំផុតមួយរបស់ពិភពលោកនៅឆ្នាំក្រោយ។

យោងតាមការិយាល័យ ​​OCHA បានឱ្យដឹងថា នៅឆ្នាំ២០២៦ មនុស្សប្រមាណ ២១,៩លាននាក់នឹងត្រូវការជំនួយមនុស្សធម៌ដែលជាការថយចុះ៤% ពីឆ្នាំ២០២៥ ហើយមនុស្ស ១៧,៤លាននាក់ត្រូវបានគេព្យាករថានឹងប្រឈមមុខនឹងអសន្តិសុខស្បៀងអាហារ រួមទាំង ៤,៧លាននាក់ស្ថិតនៅក្នុងដំណាក់កាលទី៤ (ដំណាក់កាលអាសន្ន)។

ការិយាល័យនេះបាននិយាយថា ដៃគូមនុស្សធម៌របស់អង្គការសហប្រជាជាតិនឹងផ្តល់អាទិភាពដល់មនុស្ស ១៧,៥លាននាក់សម្រាប់ជំនួយនៅឆ្នាំ២០២៦ ប្រហែល ៨០% នៃអ្នកដែលត្រូវការជំនួយ តាមរយៈការឆ្លើយតបនៃការសម្របសម្រួលដែលមានតម្លៃ ១,៧១ប៊ីលានដុល្លារអាម៉េរិក។ជំនួយនេះនឹងផ្តោតលើកិច្ចអន្តរាគមន៍សង្គ្រោះជីវិត និងការពារ រួមទាំងអាហារ ជម្រក ការថែទាំសុខភាព អាហារូបត្ថម្ភ ទឹកស្អាត អនាម័យ និងការគាំទ្រសាច់ប្រាក់។

ការិយាល័យបានបន្ដថា ដោយសារតម្រូវការនៅតែស្ថិតក្នុងចំណោមតម្រូវការខ្ពស់បំផុតនៅទូទាំងពិភពលោកក្នុងបរិបទដែលមិនមានជម្លោះលក្ខខណ្ឌមនុស្សធម៌នៅក្នុងប្រទេសអាហ្វហ្គានីស្ថាននៅតែបន្តត្រូវបានជំរុញដោយភាពងាយរងគ្រោះ អសន្តិសុខស្បៀងអាហារកាន់តែអាក្រក់ទៅៗ និងវិបត្តិដដែលៗ រួមទាំងគ្រោះរាំងស្ងួតដែលបង្កឡើងដោយអាកាសធាតុ លំហូរចូលនៃជនភៀសខ្លួនទ្រង់ទ្រាយធំ ការរញ្ជួយដី និងទឹកជំនន់ញឹកញាប់ ការផ្ទុះឡើងនៃជំងឺជាច្រើន និងហានិភ័យនៃការការពារធ្ងន់ធ្ងរ ជាពិសេសសម្រាប់ស្ត្រី និងក្មេងស្រី។

ការវិលត្រឡប់មកឆ្លងដែនយ៉ាងច្រើនបានធ្វើឱ្យតម្រូវការកាន់តែធ្ងន់ធ្ងរឡើង ដោយមានជនជាតិអាហ្វហ្គានីស្ថានជាង ២,៦១លាននាក់បានវិលត្រឡប់មកពីប្រទេសអ៊ីរ៉ង់ និងប៉ាគីស្ថានក្នុងឆ្នាំ២០២៥ តែមួយ ដែលដាក់សម្ពាធយ៉ាងខ្លាំងទៅលើសហគមន៍ម្ចាស់ផ្ទះ សេវាកម្មជាមូលដ្ឋាន និងជីវភាពរស់នៅ។ នេះបើយោងតាមការិយាល័យ ​​OCHA៕

ដោយ៖ មូល មិនា (ប្រភព៖ ភីបផលដេលី)