AKP ភ្នំពេញ ថ្ងៃទី៣០ ខែធ្នូ ឆ្នាំ២០២៥ -- អង្គការសហប្រជាជាតិកំពុងជួបប្រទះវិបត្តិហិរញ្ញវត្ថុដោយសារតែការចូលរួមវិភាគទានដែលមិនបានបង់ពីប្រទេសជាច្រើន រួមទាំងអ្នករួមចំណែកធំជាងគេ គឺសហរដ្ឋអាមេរិក ដែលជាអ្នកជំពាក់បំណុលធំជាងគេ ជាង ៣ប៊ីលានដុល្លារអាម៉េរិក។

លោក រ៉ាហ្វាអ៊ែល ហ្រ្គោសស៊ី (Rafael Grossi) ប្រធានទីភ្នាក់ងារថាមពលអាតូមិកអន្តរជាតិ (IAEA) និងជាបេក្ខភាពដឹកនាំអង្គការសហប្រជាជាតិបានអះអាងថា អង្គការសហប្រជាជាតិបាន «ចូលរួមតិចតួច» ក្នុងការដោះស្រាយជម្លោះរបស់ពិភពលោក ហើយត្រូវតែអះអាងអំពីតួនាទីនេះជាបន្ទាន់។

ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បាននិយាយពីមុនថា អង្គការសហប្រជាជាតិមិនបានជួយក្នុងការដោះស្រាយជម្លោះនៅអ៊ុយក្រែនទេ។

ដើម្បីឆ្លើយតបទៅនឹងវិបត្តិហិរញ្ញវត្ថុនេះ អង្គការសហប្រជាជាតិបានចាប់ផ្តើមបញ្ឈប់បុគ្គលិក និងកាត់បន្ថយកម្មវិធីមនុស្សធម៌សំខាន់ៗ។ វិធានការរឹតត្បិតក៏បានដាក់ចេញផងដែរនៅក្នុងទីស្នាក់ការកណ្តាលរបស់ខ្លួន ដែលរួមានតម្លៃអាហារដ្ឋានបានកើនឡើង ហើយកន្លែងទទួលទានអាហារមួយចំនួនត្រូវបានបិទទាំងស្រុង៕

ដោយ៖ យា ចិន្ដាខន្ដី (ប្រភព៖ ស្ពុតនីក)