AKP ភ្នំពេញ ថ្ងៃទី៣០ ខែធ្នូ ឆ្នាំ២០២៥ -- លោក Tiong King Sing រដ្ឋមន្ត្រីក្រសួងទេសចរណ៍ម៉ាឡេស៊ី បានប្រកាសពីការបើកដំណើរការផ្លូវហោះហើរអន្តរជាតិថ្មីចំនួន២១ បន្ថែមទៀតនៅរវាងចុងខែធ្នូ ឆ្នាំ២០២៥ និងពាក់កណ្តាលខែមករា ឆ្នាំ២០២៦ ដើម្បីត្រៀមខ្លួនសម្រាប់ «ឆ្នាំទស្សនាម៉ាឡេស៊ី ២០២៦»។ ការតភ្ជាប់ថ្មីទាំងនេះនឹងបន្ថែមជើងហោះហើរត្រង់ចំនួន៨១ជើងក្នុងមួយសប្តាហ៍ ដែលផ្តល់សមត្ថភាពសរុបដល់អ្នកដំណើរប្រមាណជិត ១៤.០០០នាក់ ដើម្បីជំរុញហេដ្ឋារចនាសម្ព័ន្ធទេសចរណ៍របស់ប្រទេស។

ការពង្រីកនេះគ្របដណ្តប់លើគោលដៅចំនួន១៧ នៅទូទាំងប្រទេសចំនួនប្រាំបី ដោយភ្ជាប់ពួកគេទៅកាន់អាកាសយានដ្ឋានសំខាន់ៗចំនួនប្រាំបួនរបស់ប្រទេសម៉ាឡេស៊ី ដែលរួមមានទីក្រុងគូឡាឡាំពួរ ទីក្រុងប៉េណាង និងទីក្រុងកូតាគីណាបាលូ ។ តំបន់អាស៊ីបូព៌ា គឺជាចំណុចកណ្តាលចម្បងនៃគំនិតផ្តួចផ្តើមនេះ ដោយមានជើងហោះហើរចំនួន១០ ដែលផ្តោតទៅលើទីក្រុងចំនួនប្រាំបីនៅក្នុងប្រទេសចិន រួមជាមួយនឹងសេវាកម្មថ្មីៗទៅកាន់ទីក្រុងអូសការបស់ប្រទេសជប៉ុន ទីក្រុងប៊ូសានរបស់ប្រទេសកូរ៉េខាងត្បូង និងទីក្រុងតៃជុងរបស់កោះតៃវ៉ាន់ (ចិន)។ ការរីកចម្រើនជាយុទ្ធសាស្ត្រនេះមានគោលបំណងចាប់យកទីផ្សារសំខាន់ៗ និងបង្កើនភាពងាយស្រួលសម្រាប់អ្នកធ្វើដំណើរអន្តរជាតិ។

ក្រៅពីតំបន់អាស៊ីបូព៌ា ផែនការនេះពង្រឹងការតភ្ជាប់នៅក្នុងតំបន់អាស៊ានតាមរយៈផ្លូវថ្មីចំនួន៦ ទៅកាន់ប្រទេសសិង្ហបុរី ឥណ្ឌូណេស៊ី និងហ្វីលីពីន។ លើសពីនេះទៀត ប្រទេសម៉ាឡេស៊ីកំពុងពង្រីកវិសាលភាពរបស់ខ្លួនទៅកាន់តំបន់អាស៊ីកណ្តាល និងអាស៊ីខាងត្បូង ជាមួយនឹងជើងហោះហើរទៅកាន់ទីក្រុងតាស្កិនរបស់ប្រទេសអ៊ូសបេគីស្ថាន និងទីក្រុងកូឡុមបូរបស់ប្រទេសស្រីលង្កា។ ការអភិវឌ្ឍទាំងនេះតំណាងឱ្យកិច្ចខិតខំប្រឹងប្រែងដ៏ទូលំទូលាយមួយ ដើម្បីធ្វើពិពិធកម្មប្រភពទេសចរណ៍របស់ប្រទេសម៉ាឡេស៊ី និងធានាបាននូវឆ្នាំផ្សព្វផ្សាយឆ្នាំ២០២៦ ដ៏ជោគជ័យមួយ៕

ដោយ៖ យា ចិន្ដាខន្ដី (ប្រភព៖ VNA)