AKP ភ្នំពេញ ថ្ងៃទី៣០ ខែធ្នូ ឆ្នាំ២០២៥ -- ប្រទេសឥណ្ឌូណេស៊ីកំពុងពន្លឿនគំនិតផ្តួចផ្តើមបម្លែងកាកសំណល់ទៅជាថាមពល (WtE) របស់ខ្លួន ដើម្បីគ្រប់គ្រងកាកសំណល់ចំនួន ៣៥-៦០លានតោនដែលខ្លួនបានបង្កើតជារៀងរាល់ឆ្នាំ។ ដោយត្រូវបានដឹកនាំដោយទីភ្នាក់ងារវិនិយោគជាតិDanantara និងក្រុមហ៊ុនផ្គត់ផ្គង់អគ្គិសនីរដ្ឋ PLN គំនិតផ្តួចផ្តើមនេះមានគោលបំណងផ្លាស់ប្តូរពីការចោលសំរាមដោយបម្លែងកាកសំណល់សរីរាង្គទៅជាជម្រើសកកើតឡើងវិញជំនួសឥន្ធនៈហ្វូស៊ីល។ យុទ្ធសាស្ត្រនេះ គឺជាសសរស្តម្ភកណ្តាលនៃការផ្លាស់ប្តូររបស់ប្រទេសឥណ្ឌូណេស៊ីឆ្ពោះទៅរកសេដ្ឋកិច្ចបៃតង។

គំនិតផ្តួចផ្តើមនេះផ្តោតសំខាន់ទៅលើការកសាងប្រព័ន្ធអេកូឡូស៊ីប្រកបដោយចីរភាព ដែលទីភ្នាក់ងារ Danantara គ្រប់គ្រងរោងចក្រ WtE រួមគ្នាជាមួយអាជ្ញាធរមូលដ្ឋាន ដើម្បីធានាបាននូវស្តង់ដារបច្ចេកទេស និងការវិនិយោគដែលមានស្ថេរភាព។ ខណៈដែលគំនិតផ្តួចផ្តើមនេះប្រឈមមុខនឹងឧបសគ្គមួយចំនួន ដូចជាបញ្ហាអភិបាលកិច្ច និងការរឹតបន្តឹងដើមទុន វាស្វែងរកការបំពេញចន្លោះប្រហោងទាំងនេះតាមរយៈកិច្ចសន្យារយៈពេលវែង និងបរិយាកាសវិនិយោគដែលមានតម្លាភាព។ ប្រតិបត្តិការដំបូងនឹងផ្តល់អាទិភាពដល់ទីក្រុងហ្សាការតា មុនពេលពង្រីកដល់តំបន់ទីក្រុងចំនួន៣៣ នៅទូទាំងកោះចាវ៉ា កោះបាលី និងលើសពីនេះ។

ជាមួយនឹងការវិនិយោគដែលត្រូវបានព្យាករណ៍ចំនួន ២,៧២ប៊ីលានដុល្លារអាម៉េរិក ប្រទេសឥណ្ឌូណេស៊ីមានគោលបំណងផលិតអគ្គិសនីចំនួន៤៥៣មេហ្គាវ៉ាត់ពីកាកសំណល់នៅត្រឹមឆ្នាំ២០៣៤។ ភាពជោគជ័យនៅក្នុងវិស័យនេះត្រូវបានគេរំពឹងថានឹងជំរុញផលិតភាពសេដ្ឋកិច្ចក្នុងស្រុក បង្កើនប្រាក់ចំណូលរបស់រដ្ឋាភិបាល និងកែលម្អបរិស្ថានរស់នៅយ៉ាងសំខាន់។នៅទីបំផុត គំនិតផ្តួចផ្តើម WtE តំណាងឱ្យវិធីសាស្រ្តទំនើបមួយក្នុងការដោះស្រាយបញ្ហាប្រឈមផ្នែកបរិស្ថានរយៈពេលវែង ខណៈដែលស្របទៅនឹងគោលបំណងនៃកំណើនបៃតងដ៏ទូលំទូលាយរបស់ប្រទេសឥណ្ឌូណេស៊ី៕

ដោយ៖ យា ចិន្ដាខន្ដី (ប្រភព៖ VNA)