AKP ភ្នំពេញ ថ្ងៃទី២៦ ខែធ្នូ ឆ្នាំ២០២៥ -- យោងតាមប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃសុក្រនេះថា មេដឹកនាំកូរ៉េខាងជើង លោក គីម ជុងអ៊ុន (Kim Jong-un) បានបង្ហាញផែនការសាងសង់រោងចក្រផលិតគ្រាប់រំសេវថ្មី ដើម្បីពង្រីកសមត្ថភាពផលិតមីស៊ីល និងគ្រាប់ផ្លោង ដោយលោកបានសង្កត់ធ្ងន់ថា ការបង្កើនផលិតកម្មរបស់ពួកគេគឺមានសារៈសំខាន់ណាស់ក្នុងការជំរុញការទប់ស្កាត់សង្គ្រាម។

យោងតាមទីភ្នាក់ងារសារព័ត៌មានកណ្តាលកូរ៉េ (KCNA) បានឱ្យដឹងថា លោក គីម បានធ្វើការកត់សម្គាល់នេះក្នុងអំឡុងពេលទស្សនកិច្ចរបស់លោកទៅកាន់សហគ្រាសឧស្សាហកម្មគ្រាប់រំសេវធំៗ ហើយលោកបានត្រួតពិនិត្យការផលិតមីស៊ីល និងគ្រាប់ផ្លោងនៅក្នុងត្រីមាសទីបួន។ ទីភ្នាក់ងារមិនបានបញ្ជាក់លម្អិតអំពីកាលបរិច្ឆេទនៃការត្រួតពិនិត្យរបស់លោក ឬទីតាំងរោងចក្រនោះទេ។

លោកបានបញ្ជាឱ្យពង្រីកសមត្ថភាពផលិតមីស៊ីល និងគ្រាប់ផ្លោងដោយលោកបានកត់សម្គាល់ថា ផែនការសាងសង់រោងចក្រផលិតគ្រាប់រំសេវថ្មីនឹងត្រូវសម្រេចនៅក្នុងសមាជបក្សនាពេលខាងមុខ។ នេះបើយោងតាមទីភ្នាក់ងារ ​​KCNA។

ទីភ្នាក់ងារ ​​KCNA បានឱ្យដឹងថា លោក គីម បាននិយាយថា «ដើម្បីបំពេញតម្រូវការនាពេលអនាគតរបស់កងកម្លាំងមីស៊ីល និងកាំភ្លើងធំរបស់កងទ័ពប្រជាជនកូរ៉េ ចាំបាច់ត្រូវលើកកម្ពស់កម្រិតទំនើបកម្មនៃឧស្សាហកម្មគ្រាប់រំសេវជាបន្តបន្ទាប់ ដោយបង្កើតសហគ្រាសឧស្សាហកម្មគ្រាប់រំសេវថ្មីតាមការគ្រោងទុក»។

លោកបានបន្ថែមថា «ជាពិសេស វិស័យផលិតមីស៊ីល និងគ្រាប់ផ្លោងមានសារៈសំខាន់បំផុតក្នុងការជំរុញការទប់ស្កាត់សង្គ្រាម»។ ក្រុម​អ្នក​អមដំណើរ​របស់​លោក គីម រួមមាន លោក ចូ ឈុនរីយ៉ុង (Jo Chun-ryong)លេខាធិការ​បក្ស និង​លោក គីម ជុងស៊ីក (Kim Jong-sik) អនុប្រធាន​ទីមួយ​ទទួលបន្ទុក​ឧស្សាហកម្ម​អាវុធ​នៅ​គណបក្ស​ពលករ​កូរ៉េ។

មេដឹកនាំ​កូរ៉េខាងជើង​តែងតែ​អំពាវនាវ​ឱ្យពង្រីក​ការផលិត​មីស៊ីល និង​គ្រាប់ផ្លោង​ក្នុងអំឡុងពេល​ទស្សនកិច្ច​របស់លោក​ទៅកាន់​រោងចក្រ​អាវុធ​សំខាន់ៗ ដែល​បង្កើន​ការសង្ស័យ​ថា ចលនា​នេះ​ទាក់ទង​នឹង​ការនាំចេញ​អាវុធ​របស់ប្រទេស​កូរ៉េខាងជើង​ទៅកាន់ប្រទេស​រុស្ស៊ី។

ចាប់តាំងពីប្រទេស​កូរ៉េខាងជើង​បាន​បញ្ជូន​កងទ័ព​ប្រហែល១៥.០០០នាក់​ដើម្បី​គាំទ្រ​សង្គ្រាម​របស់​រុស្ស៊ី​ជាមួយ​អ៊ុយក្រែន លោក គីមបាន​គូសបញ្ជាក់​ពី​តម្រូវការ​ក្នុងការ​ធ្វើទំនើបកម្ម​អាវុធ​ធម្មតា និង​ពង្រឹង​សមត្ថភាព​ប្រយុទ្ធ៕

ដោយ៖ មូល មិនា (ប្រភព៖ យ៉ុនហាប់)