AKP ភ្នំពេញ ថ្ងៃទី២៦ ខែធ្នូ ឆ្នាំ២០២៥ -- ស្ថានទូតចិនប្រចាំប្រទេសអេត្យូពីបានបរិច្ចាគម៉ូតូរាប់សិបគ្រឿងដល់គណៈកម្មការប៉ូលីសសហព័ន្ធអេត្យូពី ដើម្បីគាំទ្រដល់ការគ្រប់គ្រងចរាចរណ៍ និងកិច្ចខិតខំប្រឹងប្រែងសន្តិសុខ។

ម៉ូតូទាំងនេះត្រូវបានប្រគល់ជូននៅឯទីស្នាក់ការកណ្តាលរបស់គណៈកម្មការនៅទីក្រុងអាឌីសអាបាបា រដ្ឋធានីនៃប្រទេសនេះ ក្នុងពិធីមួយដែលមានការចូលរួមពីលោក ដេមេឡាស ហ្គេប្រេមីឆែល (DemelashGebremichael) ស្នងការប៉ូលីសសហព័ន្ធអេត្យូពី មន្ត្រីសន្តិសុខជាន់ខ្ពស់អេត្យូពីផ្សេងទៀត និងអ្នកការទូតចិន។

ការប្រគល់ម៉ូតូទំនើបៗចុងក្រោយបង្អស់ រួមជាមួយនឹងឯកសណ្ឋានប៉ូលីស ត្រូវបានគេរំពឹងថានឹងបង្កើនសមត្ថភាពរបស់ប៉ូលីសសហព័ន្ធអេត្យូពីក្នុងការការពារ សេវាកម្មអមដំណើរ និងការគ្រប់គ្រងចរាចរណ៍ផ្លូវហាយវេ។

លោក ស៊ុន មីងស៊ី (Sun Mingxi) ភារធារីស្ថានទូតចិនប្រចាំប្រទេសអេត្យូពី បានសរសើរចំពោះកិច្ចខិតខំប្រឹងប្រែងរបស់ប៉ូលីសអេត្យូពីក្នុងការការពារសុវត្ថិភាព ក៏ដូចជាសិទ្ធិ និងផលប្រយោជន៍ស្របច្បាប់របស់ស្ថាប័ននិងបុគ្គលិកចិននៅក្នុងប្រទេស។

លោកក៏បានសម្តែងការគាំទ្ររបស់ប្រទេសចិនចំពោះការពង្រឹងសមត្ថភាពអនុវត្តន៍ច្បាប់របស់ប៉ូលីសអេត្យូពី ដើម្បីរក្សាសន្តិសុខ និងស្ថិរភាពសង្គមបានកាន់តែប្រសើរឡើង។

អំណោយនេះត្រូវបានគេរំពឹងថានឹងជួយសម្រួលដល់លំហូរចរាចរណ៍ដ៏រលូនក្នុងអំឡុងពេលព្រឹត្តិការណ៍សំខាន់ៗនៅក្នុងរដ្ឋធានីអេត្យូពី។ ក្នុងនាមជាទីតាំងនៃទីស្នាក់ការកណ្តាលនៃសហភាពអាហ្វ្រិក (AU) ទីក្រុងអាឌីសអាបាបាធ្វើជាម្ចាស់ផ្ទះនៃកិច្ចប្រជុំកំពូលមេដឹកនាំ AU និងកិច្ចប្រជុំកម្រិតកំពូលផ្សេងទៀតជារៀងរាល់ឆ្នាំ៕

ដោយ៖ មូល មិនា (ប្រភព៖ ភីបផលដេលី)