AKP ភ្នំពេញ ថ្ងៃទី២៦ ខែធ្នូ ឆ្នាំ២០២៥ -- អ្នកនាំពាក្យក្រសួងការបរទេសរុស្ស៊ី លោកស្រី ម៉ារីយ៉ា ហ្សាខារ៉ូវ៉ា (Maria Zakharova) បាននិយាយកាលពីថ្ងៃព្រហស្បតិ៍ថា វឌ្ឍនភាពយឺតយ៉ាវ ប៉ុន្តែមានស្ថិរភាព កំពុងត្រូវបានគេសង្កេតឃើញនៅក្នុងកិច្ចចរចារបស់រុស្ស៊ីជាមួយសហរដ្ឋអាមេរិក ស្តីពីដំណោះស្រាយអ៊ុយក្រែន។

លោកស្រី ហ្សាខារ៉ូវ៉ា បាននិយាយបន្ថែមថា ក្នុងអំឡុងពេលនៃទំនាក់ទំនងជាមួយទីក្រុងវ៉ាស៊ីនតោន ទីក្រុងម៉ូស្គូអំពាវនាវឱ្យសហរដ្ឋអាមេរិកទប់ទល់នឹងការប៉ុនប៉ងរបស់ប្រទេសលោកខាងលិចក្នុងការធ្វើឱ្យខូចដល់កិច្ចខិតខំប្រឹងប្រែងសន្តិភាពនៅអ៊ុយក្រែន។

លោកស្រី ហ្សាខារ៉ូវ៉ា បាននិយាយថា សហភាពអឺរ៉ុបនៅតែភ្នាល់ទៅលើការកើនឡើងនៃជម្លោះ និងការបន្តប្រយុទ្ធនៅក្នុងប្រទេសអ៊ុយក្រែន។

អ្នកនាំពាក្យរូបនេះបានបន្ថែមថា បណ្តាអ្នកដឹកនាំរបស់សហភាពអឺរ៉ុបដែលបានសម្រេចចិត្តចំណាយប្រាក់ ៩០ប៊ីលានអឺរ៉ូ (១០៥,៩ប៊ីលានដុល្លារអាម៉េរិក) ដើម្បីគាំទ្រទីក្រុងគៀវ ជំនួសឱ្យការអភិវឌ្ឍប្រទេសអ៊ុយក្រែន គឺជាការចាប់អារម្មណ៍តែលើការសម្លាប់រង្គាលប៉ុណ្ណោះ៕

ដោយ៖ យា ចិន្ដាខន្ដី (ប្រភព៖ ស្ពុតនីក)