AKP ភ្នំពេញ ថ្ងៃទី២៣ ខែធ្នូ ឆ្នាំ២០២៥ -- មនុស្សចំនួន ០៣នាក់ត្រូវបានសម្លាប់កាលពីថ្ងៃចន្ទនៅក្នុងការវាយប្រហារដោយយន្តហោះគ្មានមនុស្សបើក (ដ្រូន) របស់អ៊ីស្រាអែលដែលបានកំណត់គោលដៅទៅលើយានយន្តមួយនៅភាគខាងត្បូងប្រទេសលីបង់ ដែលជាការរំលោភលើកិច្ចព្រមព្រៀងឈប់បាញ់ថ្មីមួយ។ នេះបើយោងតាមប្រព័ន្ធផ្សព្វផ្សាយរបស់លីបង់។

ទីភ្នាក់ងារសារព័ត៌មានរដ្ឋ NNA បានរាយការណ៍ថា ការវាយប្រហារនេះបានធ្វើឡើងទៅលើរថយន្តមួយគ្រឿងនៅលើផ្លូវ Aqtnit–Quneitra ក្នុងស្រុក Sidon។

មិនមានការអត្ថាធិប្បាយភ្លាមៗពីអ៊ីស្រាអែលចំពោះការវាយប្រហារនេះទេ។

ភាពតានតឹងបានកើនឡើងនៅភាគខាងត្បូងប្រទេសលីបង់អស់រយៈពេលជាច្រើនសប្តាហ៍មកហើយ ដោយយោធាអ៊ីស្រាអែលបានបង្កើនការវាយប្រហារតាមអាកាសស្ទើរតែរាល់ថ្ងៃនៅក្នុងទឹកដីលីបង់ ដោយអះអាងថា បានកំណត់គោលដៅទៅលើសមាជិក និងហេដ្ឋារចនាសម្ព័ន្ធរបស់ក្រុមឧទ្ទាមហេបូឡាហ៍។

អ៊ីស្រាអែល និងលីបង់បានឈានដល់បទឈប់បាញ់មួយនៅក្នុងខែវិច្ឆិកា ឆ្នាំ២០២៤ បន្ទាប់ពីការវាយប្រហារឆ្លងកាត់ព្រំដែនអស់រយៈពេលជាងមួយឆ្នាំក្នុងអំឡុងពេលសង្គ្រាមនៅហ្គាហ្សា។ មនុស្សជាង ៤.០០០នាក់ត្រូវបានសម្លាប់ និង ១៧.០០០នាក់បានរងរបួស។

ក្រោមបទឈប់បាញ់នេះ កងកម្លាំងអ៊ីស្រាអែលត្រូវបានគេសន្មត់ថានឹងដកខ្លួនចេញពីភាគខាងត្បូងប្រទេសលីបង់នៅក្នុងខែមករា ប៉ុន្តែបានដកខ្លួនចេញតែផ្នែកខ្លះប៉ុណ្ណោះ ដោយរក្សាវត្តមានយោធានៅប៉ុស្តិ៍ព្រំដែនចំនួនប្រាំ៕

ដោយ៖ យា ចិន្ដាខន្ដី (ប្រភព៖ AA-AKP)