AKP ភ្នំពេញ ថ្ងៃទី២៣ ខែធ្នូ ឆ្នាំ២០២៥ -- កាលពីថ្ងៃចន្ទ ក្រុមប្រឹក្សាសហភាពអឺរ៉ុបបានពង្រីកទណ្ឌកម្មសេដ្ឋកិច្ចប្រឆាំងនឹងប្រទេសរុស្ស៊ីរយៈពេលប្រាំមួយខែទៀត ដើម្បីឆ្លើយតបទៅនឹងសង្គ្រាមដែលកំពុងបន្តនៅក្នុងប្រទេសអ៊ុយក្រែន។

យោងតាមសេចក្តីថ្លែងការណ៍របស់ក្រុមប្រឹក្សាអឺរ៉ុប បានឱ្យដឹងថាវិធានការទាំងនេះនឹងនៅតែមានសុពលភាពរហូតដល់ថ្ងៃទី៣១ ខែកក្កដាឆ្នាំ២០២៦។

ទណ្ឌកម្មដែលត្រូវបានដាក់ចេញជាលើកដំបូងក្នុងឆ្នាំ២០១៤ និងត្រូវបានពង្រីកយ៉ាងខ្លាំងបន្ទាប់ពីសង្គ្រាមបានចាប់ផ្តើមនៅក្នុងឆ្នាំ២០២២ ដោយផ្តោតទៅលើវិស័យសំខាន់ៗនៃសេដ្ឋកិច្ចរុស្ស៊ី រួមទាំងការរឹតបន្តឹងលើពាណិជ្ជកម្ម ហិរញ្ញវត្ថុ ថាមពល បច្ចេកវិទ្យា ទំនិញប្រើប្រាស់ពីរយ៉ាងឧស្សាហកម្ម ការដឹកជញ្ជូន និងវត្ថុប្រណីតជាដើម។

ទណ្ឌកម្មទាំងនេះក៏រួមបញ្ចូលទាំងការហាមឃាត់ការនាំចូល និងការផ្ទេរប្រេងឆៅតាមសមុទ្រ និងផលិតផលប្រេងឥន្ធនៈមួយចំនួនពីប្រទេសរុស្ស៊ីការដកធនាគាររុស្ស៊ីមួយចំនួនចេញពីប្រព័ន្ធហិរញ្ញវត្ថុ SWIFT និងការផ្អាកសកម្មភាពផ្សព្វផ្សាយ និងអាជ្ញាប័ណ្ណរបស់ស្ថាប័នព័ត៌មានមិនពិតដែលគាំទ្រដោយវិមានក្រឹមឡាំងនៅក្នុងសហភាពអឺរ៉ុបផងដែរ។

វិធានការជាក់លាក់ក៏ត្រូវបានដាក់ចេញដើម្បីការពារការគេចវេសពីទណ្ឌកម្មនេះផងដែរ។

សេចក្តីថ្លែងការណ៍នោះបាននិយាយថា «ដរាបណាសកម្មភាពខុសច្បាប់របស់សហព័ន្ធរុស្ស៊ីនៅតែបន្តរំលោភលើច្បាប់ជាមូលដ្ឋាននៃច្បាប់អន្តរជាតិ រួមទាំងជាពិសេសការហាមឃាត់ការប្រើប្រាស់កម្លាំង វាជាការសមស្របក្នុងការរក្សាវិធានការទាំងអស់ដែលដាក់ចេញដោយសហភាពអឺរ៉ុប និងចាត់វិធានការបន្ថែម ប្រសិនបើចាំបាច់»៕

ដោយ៖ យា ចិន្ដាខន្ដី (ប្រភព៖ AA-AKP)