AKP ភ្នំពេញ ថ្ងៃទី២៣ ខែធ្នូ ឆ្នាំ២០២៥--ប្រតិភូ គ្រូបង្វឹក កីឡាករ កីឡាការិនីជិត ២០០នាក់មកពីក្រសួងស្ថាប័ន រាជធានីខេត្ត សមាគម-ក្លឹបគ្រោងនឹងចូលរួមប្រកួតប្រជែងមេដាយលើ២៦វិញ្ញាសា នៅក្នុងការប្រកួតកីឡាតេក្វាន់ដូ ITF ជ្រើសរើសជើងឯកថ្នាក់ជាតិ ពីថ្ងៃទី២៨-៣០ ខែធ្នូ ឆ្នាំ២០២៥ នៅសាលសាកលវិទ្យាល័យភូមិន្ទភ្នំពេញ រាជធានីភ្នំពេញ។

នេះបើតាមការគូសបញ្ជាក់របស់លោក ប៉ាល់ ជីវ័ន សមាជិកគគណៈកម្មាធិការប្រតិបត្តិសហព័ន្ធតេក្វាន់ដូ ITF កម្ពុជា និងជាគ្រូបង្វឹកជម្រើសជាតិតេក្វាន់ដូ ITF កម្ពុជា សម្រាប់ឆ្នាំ២០២៥នេះបានគូសបញ្ជាក់ទីភ្នាក់ងារសារព័ត៌មានកម្ពុជា នៅព្រឹកថ្ងៃទី២៣ ខែធ្នូ ឆ្នាំ២០២៥នេះ។ 

លោក ប៉ាល់ ជីវ័ន បន្ថែមថា ការប្រកួតកីឡាតេក្វាន់ដូ ជ្រើសរើសជើងឯកថ្នាក់ជាតិ ប្រចាំឆ្នាំ២០២៥នេះត្រូវបានធ្វើឡើងក្នុងគោលបំណងចម្បង ស្រាបតាមគោលការណ៍ និងថវិកាគាំទ្រប្រចាំឆ្នាំរបស់ក្រសួងអប់រំ យុវជន និងកីឡា សម្រាប់ផែនការពន្លឿនអភិវឌ្ឍកីឡារបស់សហព័ន្ធកីឡាជាតិ។ អ្វីដែលខុសប្លែកខ្លាំងជាងរាល់ឆ្នាំ ដោយសារតែឆ្នាំ២០២៥នេះ សហព័ន្ធគ្រោងនឹងដាក់បញ្ជូលនូវវិញ្ញាសាវ័យក្មេងពី១៣ដល់១៨ឆ្នាំ និង ១៨ ដល់២៥ឆ្នាំ ខណៈការចូលរួមរបស់កីឡាករ កីឡាការិនីមកតាមបណ្តាក្លឹបនានាក៏បានកើនឡើងច្រើនជាងឆ្នាំមុនៗផងដែរ។

ជាមួយគ្នានេះ នៅតាមក្លឹបមួយចំនួន នៅខេត្តជាយដែន ដូចជានៅខេត្តកោះកុង បន្ទាយមានជ័យ ដែលកំពុងរងការឈ្លានពានពីយោធាថៃក៏នៅតែបញ្ជូនកីឡាករ កីឡាការិនីខ្លះៗចូលរួមប្រកួតដែរ គ្រាន់តែចំនួនតិចតួចជាងឆ្នាំមុន។ យ៉ាងណា លោក ប៉ាល់ ជីវ័ន អះអាងថា ចំនួនប្រតិភូ គ្រូបង្វឹក កីឡាករ កីឡាការិនីតេក្វាន់ដូ ITF ដែលបានចុះឈ្មោះចូលរួមប្រកួត ជើងឯកថ្នាក់ជាតិ ចុងខែធ្នូ ឆ្នាំ២០២៥នេះមានចំនួនជិត ២០០នាក់។

បើតាមឯកឧត្តម បួនហ៊ីង សុធីយ៉ា អគ្គលេខាធិការ សហព័ន្ធបានគូសបញ្ជាក់ថា ការប្រកួតជើងឯកថ្នាក់ជាតិ ប្រចាំឆ្នាំ២០២៥នេះ សហព័ន្ធបានដាក់វិញ្ញាសាសរុបចំនួន ២៦ ក្នុងនោះមានវិញ្ញាសាមេគុនបុរស-នារីចំនួន១០វិញ្ញាសា វិញ្ញាសាសម្តែងការពារខ្លួនបុរស-នាទី ២វិញ្ញាសា និងវិញ្ញាសាប្រយុទ្ធឯកត្តជនជាង ១០វិញ្ញាសា។ ចំពោះវិញ្ញាសាប្រយុទ្ធ ឯកត្តជន ក្នុង១ប្រកួត គឺមាន២ទឹក ហើយក្នុង១ទឹកៗមាន២នាទី សម្រាប់១នាទី ក្នុង១ទឹក។ គ្រប់ការប្រកួតទាំងអស់ បើស្មើគ្នាបន្ថែម១ទឹកទៀត បើស្មើគ្នាត្រូវប្រកួតយកពិន្ទុមាស ដោយអ្នកទាត់ ឬវាយចូលមុន ជាអ្នកឈ្នះតែម្តង។

ចំពោះលក្ខន្តិកៈនៃសិទ្ធចូលរួមប្រកួតរបស់កីឡាករ កីឡាការិនី គឺក្រសួងស្ថាប័ន រាជធានី-ខេត្ត សមាគម-ក្លឹប មានសិទ្ធិដាក់អត្តពលិកម្នាក់អាចប្រកួតបាន៣វិញ្ញាសា ហើយមានសិទ្ធិចុះឈ្មោះបញ្ជីអត្តពលិកបាន២នាក់ ក្នុង១វិញ្ញាសាទៅតាមកម្រិតអាយុ។ គ្រប់វិញ្ញាសាទាំងអស់មានចំណាត់ថ្នាក់ជ័យលាភីពីលេខ១ លេខ២ លេខ៣ និងលេខ៣ស្ទួន៕

ដោយ ហេង ណាលីន (រូបភាព៖ ឯកសារ)