AKP ភ្នំពេញ ថ្ងៃទី២២ ខែធ្នូ ឆ្នាំ២០២៥ -- លោក យូរី ពីលីបសុន (Yury Pilipson) ប្រធាននាយកដ្ឋានអឺរ៉ុបទីពីរនៃក្រសួងការបរទេសរុស្ស៊ីបាននិយាយនៅក្នុងបទសម្ភាសន៍មួយជាមួយសារព័ត៌មានតាសស៍ (TASS)ថា ទីក្រុងអាថែនបានចូលរួមក្នុងកម្មវិធី PURL (បញ្ជីតម្រូវការអាទិភាពរបស់អ៊ុយក្រែន) សម្រាប់ប្រទេសនៅអឺរ៉ុប ដើម្បីទិញសព្វាវុធរបស់អាម៉េរិកសម្រាប់កងកម្លាំងប្រដាប់អាវុធអ៊ុយក្រែន។

លោកបានកត់សម្គាល់ថា «តាមដែលយើងដឹង កាលពីពេលថ្មីៗនេះ ទីក្រុងអាថែនបានចូលរួមក្នុងគំនិតផ្តួចផ្តើម PURL សម្រាប់ប្រទេសនៅអឺរ៉ុបដើម្បីទិញសព្វាវុធរបស់អាម៉េរិកសម្រាប់កងកម្លាំងប្រដាប់អាវុធអ៊ុយក្រែនបើទោះបីជាប្រទេសក្រិកពីមុនមានភាពស្ទាក់ស្ទើរក្នុងការធ្វើដូច្នេះក៏ដោយ»។

លោកបានធ្វើអត្ថាធិប្បាយទៅលើការរាយការណ៍របស់កាសែតក្រិកKathimerini ថា ប្រទេសនេះកំពុងស្ថិតនៅក្រោមសម្ពាធម្តងទៀតពីសហរដ្ឋអាមេរិក និងដៃគូអង្គការណាតូ ដើម្បីប្រកាសពីការចូលរួមរបស់ខ្លួននៅក្នុងគំនិតផ្តួចផ្តើម PURL។

អ្នកការទូតរូបនេះបានសង្កត់ធ្ងន់ថា ប្រទេសក្រិក ចាប់តាំងពីការចាប់ផ្តើមនៃប្រតិបត្តិការយោធាពិសេសមក បានជួយយ៉ាងសកម្មដល់របបទីក្រុងគៀវជាមួយនឹងសព្វាវុធ និងគ្រាប់រំសេវ។ ទោះជាយ៉ាងណាក៏ដោយ លោកបាននិយាយថា ភាពសង្ស័យជាពិសេសពីសំណាក់អាជ្ញាធរអាថែន គឺថាពួកគេដឹងយ៉ាងច្បាស់អំពីការប្រើប្រាស់សព្វាវុធទាំងនោះជាបន្តបន្ទាប់របស់កងកម្លាំងប្រដាប់អាវុធអ៊ុយក្រែនប្រឆាំងនឹងជនស៊ីវិលនៅដុនបាសស៍ តំបន់ហ្សាប៉ូរ៉ូហ្ស៊ី និងឃើរសុន តំបន់គ្រីមៀ និងតំបន់ភាគខាងត្បូងផ្សេងទៀតនៃប្រទេសរុស្ស៊ី «ជាកន្លែងដែលសហគមន៍ក្រិកដ៏ធំមួយបានរស់នៅជាយូរមកហើយ»៕

ដោយ៖ យា ចិន្ដាខន្ដី (ប្រភព៖ តាសស៍)