AKP ភ្នំពេញ ថ្ងៃទី២២ ខែធ្នូ ឆ្នាំ២០២៥ -- ម៉ាឡេស៊ីបានបង្ហាញពីភាពធន់គួរឱ្យកត់សម្គាល់ក្នុងចំណោមភាពតានតឹងផ្នែកពាណិជ្ជកម្ម និងភាពមិនប្រាកដប្រជានៃគោលនយោបាយសកលលោក ដោយសេដ្ឋកិច្ចរបស់ខ្លួនកំពុងរីកចម្រើនក្នុងល្បឿនល្អនៅក្នុងឆ្នាំនេះ ដែលគាំទ្រដោយការប្រើប្រាស់និងការវិនិយោគក្នុងស្រុកដ៏រឹងមាំ កំណើនការងារ និងវដ្តកើនឡើងជាសកលនៅក្នុងវិស័យបច្ចេកវិទ្យា។ នេះបើយោងតាមលោក ម៉ាសាហ៊ីរ៉ូ ណាហ្សាគី (Masahiro Nozaki) ប្រធានបេសកកម្មម៉ាឡេស៊ីនៃមូលនិធិរូបិយវត្ថុអន្តរជាតិ (IMF)។

មន្ត្រីរូបនេះបាននិយាយថា ការអនុវត្តសេដ្ឋកិច្ចម៉ាឡេស៊ីឆ្លុះបញ្ចាំងពីការគ្រប់គ្រងសេដ្ឋកិច្ចដ៏រឹងមាំមួយផ្នែក ដោយសាររដ្ឋាភិបាលបានរក្សាគោលនយោបាយម៉ាក្រូសេដ្ឋកិច្ច និងសារពើពន្ធដ៏ប្រុងប្រយ័ត្ន។ កិច្ចព្រមព្រៀងពាណិជ្ជកម្មម៉ាឡេស៊ី-សហរដ្ឋអាមេរិក ដែលបានចុះហត្ថលេខានៅក្នុងខែតុលា ឆ្នាំ២០២៥ ក៏បានជួយកាត់បន្ថយភាពមិនប្រាកដប្រជាសម្រាប់ធុរកិច្ច និងអ្នកប្រើប្រាស់នៅក្នុងប្រទេសផងដែរ។

ទោះជាយ៉ាងណាក៏ដោយ លោកបានកត់សម្គាល់ថា ទិដ្ឋភាពពិភពលោកបានផ្លាស់ប្តូរ ដោយភាពមិនប្រាកដប្រជាបានក្លាយជាបទដ្ឋានថ្មី។ការកសាងឡើងវិញនូវរបាំងម៉ាក្រូសេដ្ឋកិច្ចរបស់ម៉ាឡេស៊ីនៅតែមានសារៈសំខាន់។ ភាពធន់នៃសេដ្ឋកិច្ចរបស់ប្រទេសម៉ាឡេស៊ីត្រូវបានគេរំពឹងថានឹងបន្តក្នុងរយៈពេលខ្លី ដែលគាំទ្រដោយតម្រូវការក្នុងស្រុកដ៏រឹងមាំ។អ្នកជំនាញនៃ IMF បានព្យាករណ៍ថា កំណើននឹងថយចុះបន្តិចពី ៤,៦% ក្នុងឆ្នាំ២០២៥ មកនៅត្រឹម ៤,៣% ក្នុងឆ្នាំ២០២៦ ដែលភាគច្រើនឆ្លុះបញ្ចាំងពីផលប៉ះពាល់នៃពន្ធគយខ្ពស់របស់សហរដ្ឋអាមេរិកទៅលើការនាំចេញរបស់ម៉ាឡេស៊ី។

មន្ត្រី IMF រូបនោះបាននិយាយថា ហានិភ័យចំពោះកំណើនសេដ្ឋកិច្ចមានទំនោរទៅរកការធ្លាក់ចុះ ហើយភាគច្រើនបណ្តាលមកពីកត្តាខាងក្រៅ។ក្នុងនាមជាសេដ្ឋកិច្ចបើកចំហខ្ពស់ ប្រទេសម៉ាឡេស៊ីអាចរងផលប៉ះពាល់ដោយតម្រូវការខាងក្រៅចុះខ្សោយ ក្នុងករណីមានការកើនឡើងនៃការការពារពាណិជ្ជកម្ម ភាពប្រែប្រួលនៅក្នុងទីផ្សារហិរញ្ញវត្ថុសកលលោក និងសក្តានុពលនៃការផ្ទុះឡើងវិញទាក់ទងនឹងបញ្ញាសិប្បនិម្មិត។

ទោះជាយ៉ាងណាក៏ដោយ កត្តាវិជ្ជមាននៅតែមាន រួមទាំងការទម្លាយសក្តានុពលក្នុងកិច្ចចរចាពាណិជ្ជកម្មសកលលោក ការអនុវត្តទេសចរណ៍ខ្លាំងជាងការរំពឹងទុក និងការអនុវត្តកំណែទម្រង់រចនាសម្ព័ន្ធលឿនជាងមុន៕

ដោយ៖ យា ចិន្ដាខន្ដី (ប្រភព៖ VNA)