AKP ភ្នំពេញ ថ្ងៃទី២២ ខែធ្នូ ឆ្នាំ២០២៥ -- រដ្ឋាភិបាលឥណ្ឌូណេស៊ីបាននិយាយថា សហគ្រាសខ្នាតតូចក្រៅផ្លូវការប្រហែល ១៤,៧លានបានចូលទៅក្នុងវិស័យសេដ្ឋកិច្ចផ្លូវការហើយនៅក្នុងឆ្នាំ២០២៥ នេះ ដែលវាជួយជំរុញដោយគោលនយោបាយដើម្បីបង្កើនផលិតភាព ការប្រកួតប្រជែង និងការរួមបញ្ចូលទៅក្នុងសេដ្ឋកិច្ចជាតិ។

ក្រសួងសហគ្រាសមីក្រូ ខ្នាតតូច និងមធ្យម (MSMEs) បាននិយាយដូចដែលត្រូវបានដកស្រង់ដោយទីភ្នាក់ងារសារព័ត៌មាន Antara របស់ឥណ្ឌូណេស៊ីថា ការអនុវត្តនេះឆ្លុះបញ្ចាំងពីគោលនយោបាយដែលមានគោលបំណងពង្រឹងតួនាទីផ្នែកច្បាប់ ហិរញ្ញប្បទាន និងការចូលទៅកាន់ទីផ្សារសម្រាប់អាជីវកម្មខ្នាតមីក្រូ។

ក្រសួងបានកត់ត្រាផលិតផលចំនួន ៦,៥លានដែលទទួលបានវិញ្ញាបនបត្រហាឡាល់ ខណៈដែលសហគ្រាសខ្នាតតូចជាង ១លានទទួលបានវិញ្ញាបនបត្រស្តង់ដារជាតិឥណ្ឌូណេស៊ី (SNI) ដែលធ្វើឱ្យប្រសើរឡើងនូវការអនុលោមតាម និងការប្រកួតប្រជែង។

ការផ្តល់ប្រាក់កម្ចីខ្នាតតូចដែលគាំទ្រដោយរដ្ឋក្រោមគម្រោងឥណទានធុរកិច្ចរបស់ប្រជាជន (KUR) បានឈានដល់ ២៥៧,៩ទ្រីលានរូពី (ប្រហែល១៥,៤ប៊ីលានដុល្លារអាម៉េរិក) គិតត្រឹមថ្ងៃទី១១ ខែធ្នូ ឆ្នាំ២០២៥ ដោយផ្តល់អត្ថប្រយោជន៍ដល់អ្នកខ្ចីប្រាក់ចំនួន ៤,៣៨លាននាក់ ដោយ ៦០,៨% ត្រូវបានបញ្ជូនទៅវិស័យផលិតភាព។

ការផ្តល់ហិរញ្ញប្បទានបានលើសពីគោលដៅ ហើយត្រូវបានគេរំពឹងថានឹងបង្កើតការងារចន្លោះពី ៧,៧លានទៅ ១១,៦លានកន្លែង។ ក្រសួងបាននិយាយថា ខ្លួនក៏កំពុងពង្រីកការផ្តល់ហិរញ្ញប្បទានមិនមែន KUR បន្ថែមដែរ ដោយប្រើវិញ្ញាបនបត្រដីធ្លី វិក្កយបត្រ ការបញ្ជាទិញ និងកម្មសិទ្ធិបញ្ញាជាទ្រព្យបញ្ចាំ។

ការចូលទៅកាន់ទីផ្សារបានប្រសើរឡើងតាមរយៈសហគ្រាសខ្នាតតូចចំនួន២.៨០៤ ដែលបានចូលរួមភាពជាដៃគូធុរកិច្ចដែលមានតម្លៃ ២៩ប៊ីលានរូពី ខណៈដែលសហគ្រាសធុនតូច និងមធ្យមចំនួន១២.៧៤០ បានចូលរួមក្នុងកម្មវិធីអាហារមានជីវជាតិឥតគិតថ្លៃ (MBG) របស់រដ្ឋាភិបាល។

ដោយសម្លឹងមើលទៅឆ្នាំ២០២៦ ខាងមុខនេះ ក្រសួងបាននិយាយថាខ្លួននឹងពន្លឿនកំណែទម្រង់ដើម្បីជួយសហគ្រាសខ្នាតតូចក្នុងការពង្រីកប្រកបដោយចីរភាពតាមរយៈតួនាទីផ្លូវច្បាប់កាន់តែរឹងមាំ ការផ្តល់ហិរញ្ញប្បទានប្រកបដោយផលិតភាពកាន់តែទូលំទូលាយ ទីផ្សារឌីជីថលនិងការធ្វើសមាហរណកម្មកាន់តែស៊ីជម្រៅទៅក្នុងខ្សែសង្វាក់ផ្គត់ផ្គង់ជាតិ៕

ដោយ៖ យា ចិន្ដាខន្ដី (ប្រភព៖ VNA)