AKP ភ្នំពេញ ថ្ងៃទី២២ ខែធ្នូ ឆ្នាំ២០២៥--ក្រុមមន្ទីរអប់រំ យុវជន និងកីឡាខេត្តកំពង់ចាមបានឈ្នះជើងឯក ពានរង្វាន់សម្តេចតេជោ ហ៊ុន សែន ថ្នាក់ខេត្ត លើកទី១៩ រដូវកាល ២០២៥-២០២៦ អមដោយប្រាក់រង្វាន់ ២០លានរៀល បន្ទាប់ពីបានយកឈ្នះក្រុមឡាយអ៊ិនឃីង ២-១ នៅវគ្គផ្តាច់ព្រ័ត្រ កាលពីយប់ថ្ងៃទី២១ ខែធ្នូ ឆ្នាំ២០២៥ នៅពហុកីឡដ្ឋានជាតិអូឡាំពិក។

នៅក្នុងការប្រកួតដ៏ជក់ចិត្តនេះ ក្រុមមន្ទីរអប់រំខេត្តកំពង់ចាមធ្វើសម្រចដោយបាន២គ្រាប់ ដោយកីឡាករ ហ្វីឌុស ហ្វវស៊ី នៅនាទី២៤ និងនាទី៤៥បូក៦ ខណៈ១គ្រាប់របស់ក្រុមឡាយអ៊ីនឃីន រកបានដោយកីឡាករ  Bruno Wellynton Krenkel នៅនាទី៤៥បូក១។ ដូច្នេះក្រុមមន្ទីរអប់រំខេត្តកំពង់ចាមបានគ្រងម្ចាស់ជើងឯកថ្នាក់ខេត្ត រដូវកាល ២០២៥-២០២៦នេះ ខណៈក្រុមឡាយអ៊ិនឃីង ទទួលបានជើងឯករង។ ចំពោះក្រុមចំណាត់ថ្នាក់លេខ៣ បានទៅលើក្រុមខេត្តត្បូងឃ្មុំ បន្ទាប់ពីបានយកឈ្នះក្រុមភ្នំពេញហ្គាឡាក់ស៊ី ដោយលទ្ធផល ៦-១។

ចំពោះជ័យលាភីឯកត្តជន រួមមាន៖ គ្រូបង្វឹកល្អ លោក ចាប សុផល ប្រាក់រង្វាន់ ២លានរៀល, អ្នកចាំទីល្អ កីឡាករ ទិត ហាំណាវៃ ក្រុមខេត្តកំពង់ចាម ប្រាក់រង្វាន់ ២លានរៀល, អ្នកទាត់បញ្ជូលទីច្រើនជាងគេ កីឡាករ សារី តៃម៉ូ (រកបាន២២គ្រាប់) សមាជិក្រុមខេត្តត្បូងឃ្មុំ ប្រាក់រង្វាន់ ២លានរៀល ដោយកីឡាករ សារី តៃម៉ូ ក៏ឈ្នះពានកីឡាករល្អជាងគេមួយទៀត ប្រាក់រង្វាន់ ២លានរៀល។

ចំពោះជ័យលាភីក្រុម រួមមាន៖ ក្រុមខេត្តត្បូងឃ្មុំ ឈ្នះពានរង្វាន់ Fair Play អមដោយប្រាក់រង្វាន់ ៤លានរៀល ក្រុមចំណាត់ថ្នាក់លេខ៣ (ក្រុមខេត្តត្បូងឃ្មុំ) ទទួលបានមេដាយសំរឹទ្ធ អមដោយប្រាក់រង្វាន់ ៨លានរៀល, ក្រុមជើងឯករង (ក្រុមឡាយអ៊ិនឃីង) មេដាយប្រាក់ អមដោយប្រាក់រង្វាន់ ១០លានរៀល ខណៈក្រុមជើងឯក (ក្រុមមន្ទីរអប់រំខេត្តកំពង់ចាម មេដាយមាស និងពានរង្វាន់១អមដោយប្រាក់រង្វាន់ ២០លានរៀល។

គួរបញ្ជាក់ថា មុនការប្រកួតទាំងពីរប្រកួតដណ្តើមចំណាត់ថ្នាក់លេខ៣ និងគូផ្តាច់ព្រ័ត្រដណ្តើមជើងឯក រួមទាំងមហាជនបានស្មិងស្មាធិ៍ និងគោរពវិញ្ញាណក្ខន្តចំពោះវីរកងទ័ព ខណៈការលក់សំបុត្រចូលរួមទស្សនាការប្រកួតនេះត្រូវបានគណៈកម្មការប្រកួតបាល់ទាត់ជាតិកម្ពុជា (CNCC) ប្រកាសដល់ការរៀបចំជាស្បៀងអាហារសម្រាប់ជនភៀសសឹក៕

ដោយ ហេង ណាលីន (រូបភាព៖ CNCC)