AKP ភ្នំពេញ ថ្ងៃទី១៩ ខែធ្នូ ឆ្នាំ២០២៥ -- ប្រធានាធិបតីនៃប្រទេសវេណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) បាននិយាយនៅលើស្ថានីយ័ទូរទស្សន៍ Venezolana de Television ថា ប្រទេសវេណេស៊ុយអេឡាបានត្រៀមខ្លួនរួចជាស្រេចដើម្បីការពារអធិបតេយ្យភាពរបស់ខ្លួន និងការពារសិទ្ធិចំពោះទឹកដីរបស់ខ្លួន មិនថាក្នុងកាលៈទេសៈណាក៏ដោយ។

លោកប្រធានាធិបតីបាននិយាយថា «សាធារណរដ្ឋសេរី [នៃប្រទេសវេណេស៊ុយអេឡា] អាចការពារ និងរក្សាអធិបតេយ្យភាពរបស់ខ្លួន មិនថាក្នុងកាលៈទេសៈណាក៏ដោយ»។ លោកបានសង្កត់ធ្ងន់ថា «ប្រជាជនរបស់យើង ដោយរួបរួមគ្នាយ៉ាងល្អឥតខ្ចោះជាមួយកងកម្លាំងយោធា និងប៉ូលិសនឹងធ្វើអ្វីៗគ្រប់យ៉ាងដើម្បីការពារសិទ្ធិប្រវត្តិសាស្ត្ររបស់យើងចំពោះដីធ្លីប្រេង រ៉ែ និងទឹកដីរបស់យើង»។

លោក ម៉ាឌូរ៉ូ បាននិយាយថា សហរដ្ឋអាមេរិកកំពុងស្វែងរកការផ្លាស់ប្តូររបបនៅក្នុងប្រទេសវេណេស៊ុយអេឡា និងដើម្បីដាក់រដ្ឋាភិបាលអាយ៉ងដែលនឹងប្រែក្លាយប្រទេសនេះជាមួយនឹងធនធានធម្មជាតិរបស់ខ្លួនទៅជាអាណានិគម។ លោកបានអះអាងថា សកម្មភាពឈ្លានពានរបស់ចក្រភពអាម៉េរិកបានធ្វើឱ្យមានការតស៊ូដើម្បីឯករាជ្យភាព វិបុលភាព និងអនាគតដ៏មានសុវត្ថិភាពរបស់ប្រជាជនវេណេស៊ុយអេឡា។

កាលពីថ្ងៃទី១៦ ខែធ្នូ ឆ្នាំ២០២៥ ប្រធានាធិបតីសហរដ្ឋអាមេរិក លោកដូណាល់ ត្រាំ (Donald Trump) បានព្រមាននៅលើប្រព័ន្ធផ្សព្វផ្សាយសង្គម Truth របស់លោកថា កងនាវា Armada របស់សហរដ្ឋអាមេរិកដែលបានប្រមូលផ្តុំគ្នានៅជុំវិញប្រទេសវេណេស៊ុយអេឡា «នឹងកាន់តែរីធំឡើង»រហូតដល់ប្រទេសនៅអាម៉េរិកឡាទីនមួយនេះព្រមប្រគល់ «ប្រេង ដីធ្លី និងទ្រព្យសម្បត្តិផ្សេងទៀតទាំងអស់» ទៅឱ្យទីក្រុងវ៉ាស៊ីនតោនវិញ៕

ដោយ៖ យា ចិន្ដាខន្ដី (ប្រភព៖ តាសស៍)