AKP ភ្នំពេញ ថ្ងៃទី១៦ ខែធ្នូ ឆ្នាំ២០២៥ -- ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) និងបេសកជនអាម៉េរិក បានទៅដល់ទីក្រុងប៊ែរឡាំងកាលពីថ្ងៃអាទិត្យសម្រាប់កិច្ចចរចាជុំមួយទៀត ដែលមានបំណងចរចាបញ្ចប់សង្គ្រាមនៅអ៊ុយក្រែន ខណៈដែលទីក្រុងម៉ូស្គូ និងទីក្រុងគៀវបានប្រកាន់ខ្ជាប់នូវទស្សនៈផ្ទុយគ្នាយ៉ាងខ្លាំងរបស់ពួកគេអំពីកិច្ចព្រមព្រៀងសន្តិភាពនាពេលអនាគត។

លោក ហ្សេលេនស្គី បាននិយាយថា មន្ត្រីអ៊ុយក្រែន សហរដ្ឋអាមេរិក និងអឺរ៉ុប នឹងធ្វើកិច្ចប្រជុំជាបន្តបន្ទាប់។ លោកបាននិយាយថា លោកនឹងជួបផ្ទាល់ជាមួយបេសកជនពិសេសរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) គឺលោក ស្ទីវ វីតកូហ្វ (Steve Witkoff) និងកូនប្រសាររបស់លោក ត្រាំ គឺលោក ចារ៉េដ គូស្ន័រ (Jared Kushner) នៅទីក្រុងប៊ែរឡាំង។

ឆ្លើយតបទៅនឹងសំណួររបស់អ្នកសារព័ត៌មាននៅក្នុងឃ្លីបសំឡេងក្នុងក្រុមឆាត WhatsApp លោក ហ្សេលេនស្គី បានសង្កត់ធ្ងន់ទៅលើតម្រូវការសម្រាប់អ៊ុយក្រែនក្នុងការទទួលបានការធានាយ៉ាងរឹងមាំពីសហរដ្ឋអាមេរិក និងសម្ព័ន្ធមិត្តអឺរ៉ុប ដែលស្រដៀងគ្នាទៅនឹងការធានាដែលផ្តល់ជូនដល់សមាជិកអង្គការណាតូ បន្ទាប់ពីសហរដ្ឋអាមេរិក និងប្រទេសមួយចំនួននៅអឺរ៉ុប បានរារាំងដល់ការចង់ចូលរួមសម្ព័ន្ធភាពយោធារបស់អ៊ុយក្រែន។

លោកបាននិយាយថា «ការធានាសន្តិសុខទាំងនេះ គឺជាឱកាសមួយដើម្បីទប់ស្កាត់រលកនៃការឈ្លានពានរបស់រុស្ស៊ីមួយផ្សេងទៀត ហើយនេះគឺជាការសម្របសម្រួលមួយរួចហើយនៅលើផ្នែករបស់យើង»។

លោក ហ្សេលេនស្គី បានសង្កត់ធ្ងន់ថា ការធានាសន្តិសុខណាមួយនឹងត្រូវមានកាតព្វកិច្ចផ្នែកច្បាប់ និងគាំទ្រដោយសភាសហរដ្ឋអាមេរិក ដោយបានបន្ថែមថា លោករំពឹងថានឹងមានការធ្វើបច្ចុប្បន្នភាពពីក្រុមការងាររបស់លោកបន្ទាប់ពីកិច្ចប្រជុំរវាងមន្ត្រីយោធាអ៊ុយក្រែន និងសហរដ្ឋអាមេរិកនៅទីក្រុង Stuttgart។

លោកបាននិយាយថា លោកនឹងជួបប្រជុំដាច់ដោយឡែកមួយទៀតជាមួយអធិការបតីអាល្លឺម៉ង់ លោក ហ្រ្វីដរីជ មើស (Friedrich Merz) និងប្រហែលជាជាមួយបណ្តាមេដឹកនាំអឺរ៉ុបផ្សេងទៀតនៅពេលល្ងាច។ លោកបាននិយាយថា លោកមិនទាន់ទទួលបានការឆ្លើយតបណាមួយពីសហរដ្ឋអាមេរិកចំពោះសំណើចុងក្រោយបំផុតរបស់អ៊ុយក្រែនទៅលើផែនការសន្តិភាពនៅឡើយទេ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)