AKP ភ្នំពេញ ថ្ងៃទី១៦ ខែធ្នូ ឆ្នាំ២០២៥ -- កាលពីចុងសប្តាហ៍មុន សហរដ្ឋអាមេរិកបានថ្កោលទោសចំពោះការវាយប្រហារដោយយន្តហោះគ្មានមនុស្សបើក (ដ្រូន) ទៅលើមូលដ្ឋានអង្គការសហប្រជាជាតិមួយក្នុងប្រទេសស៊ូដង់ ដែលបានសម្លាប់កងកម្លាំងរក្សាសន្តិភាពបង់ក្លាដែសចំនួន ០៦នាក់ និងធ្វើឱ្យមនុស្ស ០៨នាក់ផ្សេងទៀតរងរបួស។

ការវាយប្រហារមួយកាលពីថ្ងៃសៅរ៍សប្តាហ៍មុននៅមូលដ្ឋានអង្គការសហប្រជាជាតិក្នុងទីក្រុងកាឌុកលីរបស់ប្រទេសស៊ូដង់ តំណាងឱ្យការមិនអើពើយ៉ាងខ្លាំងចំពោះកិច្ចខិតខំប្រឹងប្រែងអន្តរជាតិដើម្បីការពារសន្តិភាព និងសន្តិសុខ។ នេះបើយោងតាមលោក ម៉ាសសាដ ប៊ូឡូស (Massad Boulos) ទីប្រឹក្សាជាន់ខ្ពស់របស់សហរដ្ឋអាមេរិកសម្រាប់កិច្ចការអារ៉ាប់ និងអាហ្វ្រិក បាននិយាយនៅលើប្រព័ន្ធផ្សព្វផ្សាយសង្គមអ៊ិច (X) របស់សហរដ្ឋអាមេរិក។

លោក ប៊ូឡូស បានទាមទារថា ភាគីជម្លោះមិនត្រូវកំណត់គោលដៅទៅលើបុគ្គលិកអង្គការសហប្រជាជាតិទេ ហើយត្រូវតែបញ្ឈប់អរិភាពដោយគ្មានលក្ខខណ្ឌជាមុន ខណៈដែលអនុញ្ញាតឱ្យចូលប្រើប្រាស់កិច្ចការមនុស្សធម៌ដោយគ្មានការរារាំង។

ការវាយប្រហារនេះបានកើតឡើង ខណៈដែលជម្លោះរវាងកងទ័ពស៊ូដង់ និងកងកម្លាំងគាំទ្ររហ័ស (RSF) នៅតែបន្តឥតឈប់ឈរ។ ការប្រយុទ្ធគ្នាចាប់តាំងពីខែមេសា ឆ្នាំ២០២៣ មក បានសម្លាប់មនុស្សអស់រាប់ពាន់នាក់ ធ្វើឱ្យមនុស្សរាប់លាននាក់ត្រូវផ្លាស់ទីលំនៅ និងនាំឱ្យមានវិបត្តិមនុស្សធម៌ដ៏អាក្រក់បំផុតមួយនៅក្នុងពិភពលោក។

ក្រុមរក្សាសន្តិភាពទាំងនេះ គឺជាផ្នែកមួយនៃកងកម្លាំងសន្តិសុខបណ្ដោះអាសន្នរបស់អង្គការសហប្រជាជាតិសម្រាប់អាប៊ីយ៉ៃ (UNISFA) ដែលត្រូវបានដាក់ពង្រាយនៅក្នុងតំបន់ព្រំដែនសម្បូរប្រេងដែលមានជម្លោះ ដែលគ្រប់គ្រងដោយប្រទេសស៊ូដង់ និងប្រទេសជិតខាងស៊ូដង់ខាងត្បូង ដែលបានប្រកាសឯករាជ្យនៅក្នុងឆ្នាំ២០១១ ដោយទាំងទាមទារផលប្រយោជន៍ និងបានជាប់ពាក់ព័ន្ធនឹងជម្លោះអស់រយៈពេលជាច្រើនឆ្នាំផងដែរ។

អាណត្តិបេសកកម្ម UNISFA ត្រូវបានបន្តកាលពីខែមុន។

លោក អេនតូនីញ៉ូ ហ្គូតេរេសស៍ (Antonio Guterres) អគ្គលេខាធិការអង្គការសហប្រជាជាតិក៏បានថ្កោលទោសចំពោះការវាយប្រហារនេះដែរ ដោយបាននិយាយថា ការវាយប្រហារបែបនេះ គឺមិនសមហេតុផល និងអាចបង្កើតជាឧក្រិដ្ឋកម្មសង្គ្រាម៕

ដោយ៖ យា ចិន្ដាខន្ដី (ប្រភព៖ AA-AKP)