AKP ភ្នំពេញ ថ្ងៃទី១៦ ខែធ្នូ ឆ្នាំ២០២៥ -- លោកស្រី កាចា កាល់ឡាស់ (Kaja Kallas) ប្រធានគោលនយោបាយការបរទេសរបស់សហភាពអឺរ៉ុប កាលពីថ្ងៃចន្ទបានបញ្ជាក់សារជាថ្មីអំពីតម្រូវការសម្រាប់ការគាំទ្រពីប្រទេសប៊ែលហ្ស៊ិក ខណៈដែលប្លុកនេះចូលទៅក្នុងកិច្ចប្រជុំមួយដើម្បីសម្រេចថា តើត្រូវប្រើប្រាស់ទ្រព្យសម្បត្តិរដ្ឋរុស្ស៊ីដែលត្រូវបានបង្កកសម្រាប់អ៊ុយក្រែនឬអត់ ដោយលោកស្រីបាននិយាយថា ពួកគេនឹងមិនចាកចេញដោយមិនទទួលបានលទ្ធផលនោះទេ។

លោកស្រី កាល់ឡាស់ បានប្រាប់អ្នកសារព័ត៌មាន ខណៈដែលរដ្ឋមន្ត្រីការបរទេសសហភាពអឺរ៉ុបបានជួបប្រជុំគ្នានៅទីក្រុងព្រុចសែលថា «យើងនឹងមិនចាកចេញពីកិច្ចប្រជុំ (នៅថ្ងៃព្រហស្បតិ៍) ទេ មុនពេលដែលយើងទទួលបានលទ្ធផល មុនពេលយើងទទួលបានការសម្រេចចិត្តទៅលើការផ្តល់មូលនិធិសម្រាប់អ៊ុយក្រែន។ ជម្រើសដែលគួរឱ្យទុកចិត្តបំផុត គឺប្រាក់សំណង ហើយនេះជាអ្វីដែលយើងកំពុងធ្វើវា»។

លោកស្រីបាននិយាយថា វិធានការនៃប្រាក់សំណងនេះ ជាការបញ្ជូនសញ្ញាច្បាស់លាស់ថា អ្នកណាដែលបង្កការខូចខាតបែបនេះដល់ប្រទេសមួយផ្សេងទៀត ត្រូវតែបង់ប្រាក់សម្រាប់សំណង។

លោកស្រី កាល់ឡាស់ បានសង្កត់ធ្ងន់ថា «បើគ្មានប្រទេសប៊ែលហ្ស៊ិកទេ (...) វានឹងមិនងាយស្រួលទេ ព្រោះពួកគេមានទ្រព្យសម្បត្តិភាគច្រើន ហើយខ្ញុំគិតថា វាសំខាន់ណាស់ដែលពួកគេយល់ព្រម»។

ខណៈដែលការពិភាក្សាទៅលើក្របខ័ណ្ឌនៃបទឈប់បាញ់ និងសន្តិភាពដែលអាចកើតមាននៅតែបន្ត លោកស្រី កាល់ឡាស់ បានគូសបញ្ជាក់អំពីតម្រូវការសម្រាប់ការធានាសន្តិសុខ «ជាក់ស្តែង» សម្រាប់អ៊ុយក្រែន។

លោកស្រី​បាន​និយាយ​ថា «ពួកគេ​មិន​អាច​ជា​ឯកសារ ឬ​ការសន្យា​បាន​ទេ។ ពួកគេ​ត្រូវតែ​ជា​កងទ័ព​ពិតប្រាកដ សមត្ថភាព​ពិតប្រាកដ ដើម្បីឱ្យ​អ៊ុយក្រែន​អាច​ការពារ​ខ្លួន​បាន»។

ដោយសំដៅទៅលើការទាមទាររបស់រុស្ស៊ីសម្រាប់ការដកខ្លួនរបស់អ៊ុយក្រែនចេញពីតំបន់ដុនបាសស៍ ដែលជាផ្នែកមួយនៃកិច្ចចរចាបទឈប់បាញ់ លោកស្រី កាល់ឡាស់ បានគូសបញ្ជាក់ថា តំបន់នេះមិនមែនជា «ល្បែងបញ្ចប់» របស់ទីក្រុងម៉ូស្គូទេ។

លោកស្រីបានកត់សម្គាល់ថា «ប្រសិនបើវាទទួលបានតំបន់ដុនបាសស៍ នោះបន្ទាយនឹងត្រូវដួលរលំ ហើយបន្ទាប់មកពួកគេពិតជាបន្តវាយយកអ៊ុយក្រែនទាំងមូលតែម្តង»។

លោកស្រី កាល់ឡាស់ ក៏បានអំពាវនាវឱ្យមានសន្តិភាពយូរអង្វែង និងប្រកបដោយចីរភាពផងដែរ ខណៈដែលលោកស្រីបានសង្កត់ធ្ងន់ថា មិនគួរមានការបន្ធូរបន្ថយណាមួយចំពោះអ្នកឈ្លានពានគេឡើយ៕

ដោយ៖ យា ចិន្ដាខន្ដី (ប្រភព៖ AA-AKP)