AKP កណ្តាល ថ្ងៃទី១៦ ខែធ្នូ ឆ្នាំ២០២៥--ឯកឧត្តម ប៊ុយ សុភ័ណ្ឌ ទីប្រឹក្សាគណៈកម្មាធិការជាតិអូឡាំពិកកម្ពុជា (NOCC) បានគូសបញ្ជាក់ថា បន្ទាប់ពីបញ្ចប់យុទ្ធនាការផ្សព្វផ្សាយការអប់រំគុណតម្លៃអូឡាំពិកក្នុងសាលារដ្ឋ នៅរាជធានីភ្នំពេញ NOCC បន្តយុទ្ធនាការផ្សព្វផ្សាយការអប់រំគុណតម្លៃអូឡាំពិកនៅតាមបណ្តាខេត្តមួយចំនួន ដោយខេត្តទី១នៃយុទ្ធនាការ គឺចាប់ផ្តើមពីខេត្តកណ្តាលក្នុងវិទ្យាល័យហ៊ុន សែន តាខ្មៅ មានសិស្សនុសិស្សថ្នាក់ទី១០ចូលរួមជាង១០០នាក់។

ឯកឧត្តមទីប្រឹក្សា NOCC បានគូសបញ្ជាក់ថា ក្នុងយុទ្ធនាការផ្សព្វផ្សាយនេះ មន្រ្តីគណៈកម្មាធិការជាតិអូឡាំពិកកម្ពុជាបានបញ្ជ្រាបចំណេះដឹងជាច្រើន ដូចជា ប្រវត្តិនៃការកកើតកីឡាអូឡាំពិក បទឈប់បាញ់អូឡាំពិក និងគុណតម្លៃស្នូលទាំង៣នៃអូឡាំពិកអន្តរជាតិមានឧត្តមភាព មិត្តភាព និងការគោរព។

ឯកឧត្តម បានពន្យល់ថា នៅក្នុងយុទ្ធនាការផ្សព្វផ្សាយនេះ  NOCC បានបញ្ជ្រាបចំណេះដឹងតាមរយៈបទបង្ហាញពីមន្រ្តីជំនាញ និងបង្រៀនសិស្សដោយឱ្យសិស្សានុសិស្សបានអនុវត្តលេងកីឡាដោយផ្ទាល់នៅលើទីលាន ដោយជ្រើសរើសប្រភេទកីឡាណាលេងជាក្រុម ដើម្បីឱ្យពួកគេយល់អំពីការរួបរួមសាមគ្គីគ្នា ដែលមាននៅក្នុងគុណតម្លៃអូឡាំពិក។ 

ឯកឧត្តម ប៊ុយ សុភ័ណ្ឌ បានរំលេចទៀតថា ក្រៅពីការបញ្ជ្រាបអំពីគុណតម្លៃអូឡាំពិក ដែលជាកិច្ចការស្នូលនៅក្នុងការអប់រំផ្សព្វផ្សាយដល់សិស្សានុសិស្ស ក្រុមការងាររបស់គណៈកម្មាធិការជាតិអូឡាំពិកក៏ផ្តោតសំខាន់បញ្ជ្រាបអំពីយុទ្ធនាការឆ្ពោះទៅទទួលរៀបចំធ្វើម្ចាស់ផ្ទះ ការប្រកួតកីឡាយុវជនអាស៊ី ឆ្នាំ២០៣១ នៅព្រះរាជាណាចក្រកម្ពុជា ដោយមានប្រទេសចូលរួមចំនួន៤៥ប្រទេសនៃទ្វីបអាស៊ី។ ជាមួយគ្នានេះ ក៏បំផុសអំពីយុទ្ធនាការយុវជនម្នាក់ចេះលេងកីឡាមួយប្រភេទប្រចាំជីវិត ក្នុងការចូលរួមបំផុសឱ្យយុវជនចូលរួមផុសផុលនៅក្នុងសកម្មភាពគាំទ្រនិងស្រឡាញ់កីឡា ដែលចលនានឹងជំរុញដល់ភាពជោគជ័យនៃការទទួលធ្វើជាម្ចាស់ផ្ទះកីឡាយុវជនអាស៊ី ដូចអំឡុងពេលធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះជាប្រវត្តិសាស្តដំបូងផងដែរ។

គួរបញ្ជាក់ថា បន្ទាប់ពីខេត្តកណ្តាល គណៈកម្មាធិការជាតិអូឡាំពិកកម្ពុជាគ្រោងនឹងចុះទៅរៀបចំផ្សព្វផ្សាយ នៅខេត្តកំពង់ស្ពឺ ខេត្តព្រះសីហនុ និងខេត្តកំពង់ឆ្នាំង៕

ដោយ ហេង ណាលីន (រូបភាព៖ NOCC)