AKP ភ្នំពេញ ថ្ងៃទី១១ ខែធ្នូ ឆ្នាំ២០២៥ -- ប្រទេសកូរ៉េខាងត្បូងបានបង្ហាញផែនការដ៏មានមហិច្ឆតាមួយកាលពីថ្ងៃពុធ ដើម្បីវិនិយោគទឹកប្រាក់ចំនួន៧០០ទ្រីលានវ៉ុន (៥៣៤ប៊ីលានដុល្លារអាម៉េរិក) ដើម្បីជំរុញវិស័យអេឡិចត្រូនិករបស់ខ្លួន និងទទួលបានអត្ថប្រយោជន៍ក្នុងការប្រកួតប្រជែងបន្ទះឈីបសកលលោក ដែលបង្កើតឡើងដោយបញ្ញាសិប្បនិម្មិត (AI) ក្នុងគោលបំណងផ្លាស់ប្តូរពីឧស្សាហកម្មដែលគ្របដណ្ដប់ដោយអង្គចងចាំទៅជាប្រព័ន្ធអេកូឡូស៊ីដែលមានតុល្យភាព និងជំរុញដោយនវានុវត្តន៍ ដែលលាតសន្ធឹងលើខ្សែសង្វាក់តម្លៃអេឡិចត្រូនិកទាំងមូល។

នៅក្នុងសន្និសីទគោលនយោបាយមួយក្រោមប្រធានបទ «ចក្ខុវិស័យនិងយុទ្ធសាស្ត្រសម្រាប់ K-Semiconductors ក្នុងយុគសម័យ AI» ដែលបានធ្វើឡើងនៅការិយាល័យប្រធានាធិបតីក្នុងទីក្រុងយ៉ុងសានប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) និងបណ្តារដ្ឋមន្ត្រីនានា បានគូសបញ្ជាក់អំពីផែនការរយៈពេលមធ្យមទៅរយៈពេលវែងរបស់រដ្ឋាភិបាល សម្រាប់ធានាបាននូវឧត្តមភាពបន្ទះឈីប។មនុស្សប្រហែល ៤០នាក់បានចូលរួមកម្មវិធីនេះ ដោយរួមមានទាំងមន្ត្រីជាន់ខ្ពស់មកពីក្រសួងសំខាន់ៗ នាយកប្រតិបត្តិមកពីក្រុមហ៊ុនអេឡិចត្រូនិចសាំស៊ុង និងក្រុមហ៊ុន SK Hynix ព្រមទាំងអ្នកតំណាងឧស្សាហកម្ម និងអ្នកសិក្សាផងដែរ។

ដើម្បី​ឈាន​ទៅ​មុខ​ហួស​ពី​ការ​គ្របដណ្ដប់​របស់​កូរ៉េខាងត្បូង​ក្នុង​វិស័យ​បន្ទះ​ឈីប​អង្គ​ចងចាំ រដ្ឋាភិបាល​បាន​និយាយ​ថា ខ្លួន​នឹង​ពន្លឿន​ការ​ស្រាវជ្រាវទៅ​លើ​ឧបករណ៍​អេឡិចត្រូនិច​ជំនាន់​ក្រោយ ដោយ​សន្យា​ផ្តល់​ថវិកាចំនួន២១,៦ប៊ី​លាន​វ៉ុន​សម្រាប់​បច្ចេកវិទ្យា​អង្គ​ចងចាំ​នា​ពេល​អនាគត​នៅត្រឹម​ឆ្នាំ២០៣២ ថវិកាចំនួន ១២៦,៨​ប៊ីលាន​វ៉ុន​សម្រាប់​បន្ទះ​ឈីប AI នៅ​ត្រឹមឆ្នាំ២០៣០ ថវិកាចំនួន ២៦ប៊ី​លាន​វ៉ុន​សម្រាប់​ឧបករណ៍​អេឡិចត្រូនិកចសមាសធាតុ និងថវិកា ៣៦ប៊ី​លាន​វ៉ុន​សម្រាប់​ការ​វេច​ខ្ចប់​ទំនើប​នៅត្រឹម​ឆ្នាំ២០៣១៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)