AKP ភ្នំពេញ ថ្ងៃទី០៩ ខែធ្នូ ឆ្នាំ២០២៥ -- អ្នកនាំពាក្យរបស់អគ្គលេខាធិការអង្គការសហប្រជាជាតិបាននិយាយថា លោក អានតូញ៉ូ ហ្គូធឺរេស (Antonio Guterres) បានស្វាគមន៍ចំពោះការចុះហត្ថលេខាជាផ្លូវការនៃកិច្ចព្រមព្រៀងសម្រាប់សន្តិភាព និងវិបុលភាពរវាងសាធារណរដ្ឋប្រជាធិបតេយ្យកុងហ្គោ(DRC) និងរវ៉ាន់ដា។

អ្នកនាំពាក្យ លោក ស្ទេហ្វាន ឌូចាររីក (Stephane Dujarric) បាននិយាយនៅក្នុងសេចក្តីថ្លែងការណ៍មួយថា ប្រមុខអង្គការសហប្រជាជាតិបានសង្កត់ធ្ងន់ថា កិច្ចព្រមព្រៀងនេះតំណាងឱ្យជំហានដ៏សំខាន់មួយឆ្ពោះទៅរកការស្តារទំនុកចិត្តឡើងវិញរវាងសាធារណរដ្ឋប្រជាធិបតេយ្យកុងហ្គោ និងរវ៉ាន់ដា និងការជំរុញកិច្ចខិតខំប្រឹងប្រែងសម្រាប់សន្តិភាពយូរអង្វែងនៅភាគខាងកើតសាធារណរដ្ឋប្រជាធិបតេយ្យកុងហ្គោ។

លោក ឌូចាររីក បាននិយាយថា អគ្គលេខាធិការក៏បានស្វាគមន៍ចំពោះវឌ្ឍនភាពដ៏សំខាន់ដែលបានធ្វើឡើងក្រោមដំណើរការដឹកនាំដោយទីក្រុងដូហា និងសហភាពអាហ្វ្រិក ហើយលោកបានជំរុញឱ្យគ្រប់ភាគីទាំងអស់គោរពការប្តេជ្ញាចិត្តដែលពួកគេបានធ្វើ។

លោកបានមានប្រសាសន៍ថា «អគ្គលេខាធិការសូមបញ្ជាក់ជាថ្មីថាអង្គការសហប្រជាជាតិ រួមទាំងបេសកកម្មស្ថេរភាពរបស់អង្គការសហប្រជាជាតិនៅសាធារណរដ្ឋប្រជាធិបតេយ្យកុងហ្គោ(MONUSCO) ត្រៀមខ្លួនជាស្រេចដើម្បីបន្តគាំទ្រកិច្ចខិតខំប្រឹងប្រែងទាំងអស់ឆ្ពោះទៅរកសន្តិភាព និងស្ថិរភាពប្រកបដោយចីរភាពនៅក្នុងសាធារណរដ្ឋប្រជាធិបតេយ្យកុងហ្គោ និងតំបន់»។

ប្រធានាធិបតីនៃសាធារណរដ្ឋប្រជាធិបតេយ្យកុងហ្គោ និងរវ៉ាន់ដាបានចុះហត្ថលេខាលើកិច្ចព្រមព្រៀងសន្តិភាពមួយនៅទីក្រុងវ៉ាស៊ីនតោនឌីស៊ី ដែលមានគោលបំណងបញ្ចប់ជម្លោះអស់រយៈពេលជាច្រើនទសវត្សរ៍នៅភាគខាងកើតសាធារណរដ្ឋប្រជាធិបតេយ្យកុងហ្គោ៕

ដោយ៖ មូល មិនា (ប្រភព៖ ភីបផលដេលី)