AKP ភ្នំពេញ ថ្ងៃទី០៩ ខែធ្នូ ឆ្នាំ២០២៥ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) កាលពីថ្ងៃអាទិត្យ បានអះអាងថាប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) «មិនទាន់ត្រៀមខ្លួន» ដើម្បីចុះហត្ថលេខាលើសំណើសន្តិភាពដែលរៀបចំដោយសហរដ្ឋអាមេរិក ដែលមានគោលបំណងបញ្ចប់សង្គ្រាមរុស្ស៊ី-អ៊ុយក្រែននៅឡើយទេ។

លោក ត្រាំ បានរិះគន់លោក ហ្សេលេនស្គី បន្ទាប់ពីអ្នកចរចាអាម៉េរិកនិងអ៊ុយក្រែនបានបញ្ចប់កិច្ចចរចារយៈពេលបីថ្ងៃកាលពីថ្ងៃសៅរ៍សប្តាហ៍មុន ដែលមានគោលបំណងព្យាយាមបង្រួមភាពខុសគ្នាលើសំណើរបស់រដ្ឋបាលអាម៉េរិក។ ប៉ុន្តែនៅក្នុងកិច្ចសន្ទនាជាមួយអ្នកសារព័ត៌មានកាលពីយប់ថ្ងៃអាទិត្យ លោក ត្រាំ បានលើកឡើងថា មេដឹកនាំអ៊ុយក្រែនកំពុងពន្យារពេលកិច្ចចរចា។

លោក ត្រាំ បានអះអាងនៅក្នុងកិច្ចសន្ទនាជាមួយអ្នកសារព័ត៌មានមុនពេលចូលរួមក្នុងពិធីប្រគល់រង្វាន់ Kennedy Center Honors ថា «ខ្ញុំជឿជាក់ថា រុស្ស៊ីមិនអីទេ ប៉ុន្តែខ្ញុំមិនប្រាកដថាលោក ហ្សេលេនស្គី មិនអីដែរនោះទេ។ប្រជាជនរបស់លោកចូលចិត្តវា។ ប៉ុន្តែលោកមិនទាន់ត្រៀមខ្លួនទេ»។

ជាការប្រាកដប្រជា ប្រធានាធិបតីរុស្ស៊ី លោក វ្ល៉ាឌីមៀ ពូទីន(Vladimir Putin) មិនទាន់បានបង្ហាញការយល់ព្រមជាសាធារណៈចំពោះផែនការរបស់សេតវិមាននៅឡើយទេ។ តាមពិតទៅ លោក ពូទីន កាលពីសប្តាហ៍មុន បាននិយាយថា ទិដ្ឋភាពនៃសំណើរបស់លោក ត្រាំ គឺមិនអាចដំណើរការបានទេ បើទោះបីជាសេចក្តីព្រាងដើមមានការពេញចិត្តជាខ្លាំងពីទីក្រុងម៉ូស្គូក៏ដោយ។

លោក ត្រាំ មានទំនាក់ទំនងក្តៅគគុកជាមួយលោក ហ្សេលេនស្គីចាប់តាំងពីឡើងកាន់តំណែងសម្រាប់អាណត្តិទីពីរនៅសេតវិមានមក ដោយលោកបានទទូចថា សង្គ្រាមនេះ គឺជាការខ្ជះខ្ជាយលុយពន្ធរបស់សហរដ្ឋអាមេរិក។ លោក ត្រាំ ក៏បានជំរុញម្តងហើយម្តងទៀតឱ្យប្រជាជនអ៊ុយក្រែនប្រគល់ទឹកដីទៅឱ្យរុស្ស៊ី ដើម្បីបញ្ចប់ជម្លោះដែលមានរយៈបេលប្រមាណជិតបួនឆ្នាំកន្លងមកនេះ ដែលលោកបាននិយាយថា វាបានធ្វើឱ្យមនុស្សស្លាប់ច្រើនពេកហើយ៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)