AKP ភ្នំពេញ ថ្ងៃទី០៩ ខែធ្នូ ឆ្នាំ២០២៥ -- កាលពីថ្ងៃចន្ទ ប្រធានាធិបតីអាស៊ែrបៃហ្សង់ លោក អ៊ីលហាំ អាលីយ៉េវ (Ilham Aliyev) បានកោតសរសើរពីសន្ទុះថ្មីនៃទំនាក់ទំនងជាមួយអ៊ីរ៉ង់ ខណៈដែលលោកបានជួបជាមួយគណៈប្រតិភូដែលដឹកនាំដោយរដ្ឋមន្ត្រីការបរទេសទីក្រុងតេអេរ៉ង់។

ក្នុងអំឡុងពេលនៃកិច្ចចរចានៅទីក្រុងបាគូ លោក អាលីយ៉េវ បាននិយាយថា ដំណើរទស្សនកិច្ចថ្មីៗនេះរបស់ប្រធានាធិបតីអ៊ីរ៉ង់ លោក ម៉ាសូអ៊ូដ ប៉េហ្សេសគីអាន់ (Masoud Pezeshkian) ទៅកាន់ប្រទេសអាស៊ែរបៃហ្សង់ រួមជាមួយនឹងការផ្លាស់ប្តូរកម្រិតខ្ពស់ជាបន្តបន្ទាប់ បានជួយពង្រឹងកិច្ចសហប្រតិបត្តិការរវាងប្រទេសជិតខាងទាំងពីរ។ នេះបើយោងតាមសេចក្តីថ្លែងការណ៍របស់ប្រធានាធិបតីអាស៊ែរបៃហ្សង់។

លោក អាលីយ៉េវ បានសម្តែងការពេញចិត្តចំពោះការពង្រឹងទំនាក់ទំនងរបស់យើងនាពេលថ្មីៗនេះ ហើយលោកបាននិយាយទៅកាន់រដ្ឋមន្ត្រីការបរទេសអ៊ីរ៉ង់ លោក អាបាស់ អារ៉ាកជី (Abbas Araghchi) ថារបៀបវារៈទ្វេភាគីរបស់ពួកគេ គឺទូលំទូលាយ និងជាក់ស្តែង។

លោក អាលីយ៉េវ បាននិយាយថា ភាគីទាំងពីរឥឡូវនេះមានរបៀបវារៈដែលបានពង្រីកគ្របដណ្តប់លើវិស័យជាច្រើន ហើយលោកបានកត់សម្គាល់ថា គណៈកម្មការអន្តររដ្ឋាភិបាលកំពុងដំណើរការប្រកបដោយជោគជ័យ។ លោកបានចង្អុលបង្ហាញអំពីវឌ្ឍនភាពក្នុងវិស័យនានា ដូចជាវិស័យពាណិជ្ជកម្ម ការដឹកជញ្ជូន និងថាមពល ហើយលោករំពឹងថាដំណើរទស្សនកិច្ចរបស់គណៈប្រតិភូអ៊ីរ៉ង់នឹងទទួលបានជោគជ័យ និងប្រកបដោយផលិតភាព។

លោក អារ៉ាកជី បានពាំនាំនូវការសួរសុខទុក្ខរបស់លោក ប៉េហ្សេសគីអាន់ ហើយបាននិយាយថា ថ្នាក់ដឹកនាំអ៊ីរ៉ង់ផ្តល់តម្លៃខ្ពស់ចំពោះទំនាក់ទំនងរបស់ខ្លួនជាមួយទីក្រុងបាគូ។ លោកបានកត់សម្គាល់ថា ការពង្រឹងទំនាក់ទំនងជាមួយអាស៊ែរបៃហ្សង់ គឺស្ថិតក្នុងចំណោមការណែនាំរបស់លោក ប៉េហ្សេសគីអាន់ បន្ទាប់ពីលោកបានចូលកាន់តំណែង។ 

លោកប្រធានាធិបតី​បាន​និយាយ​ថា មន្ត្រី​ទាំងពីរ​រូប​ក៏​បាន​ផ្លាស់ប្ដូរ​ទស្សនៈគ្នាទៅ​លើ​បញ្ហា​តំបន់ និង​បញ្ហា​ដែល​មាន​ផលប្រយោជន៍​រួម​គ្នា​ផង​ដែរ៕

ដោយ៖ យា ចិន្ដាខន្ដី (ប្រភព៖ AA-AKP)