ទីភ្នាក់ងារសារព័ត៌មានកម្ពុជា

អ៊ីតាលីនឹងបញ្ជូនការផ្គត់ផ្គង់បន្ទាន់ទៅអ៊ុយក្រែនដើម្បីគាំទ្រដល់ហេដ្ឋារចនាសម្ព័ន្ធថាមពលរបស់ខ្លួន

ចែករំលែក ៖

AKP ភ្នំពេញ ថ្ងៃទី០៩ ខែធ្នូ ឆ្នាំ២០២៥ -- នាយករដ្ឋមន្ត្រីអ៊ីតាលី លោកស្រីចចជៀ ម៉េឡូនី (Giorgia Meloni) បាននិយាយតាមទូរស័ព្ទកាលពីថ្ងៃអាទិត្យជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskyy) ថា ប្រទេសរបស់លោកស្រីនឹងបញ្ជូនការផ្គត់ផ្គង់បន្ទាន់ទៅកាន់ប្រទេសអ៊ុយក្រែន ដើម្បីជំរុញហេដ្ឋារចនាសម្ព័ន្ធថាមពលរបស់ខ្លួន។

ការិយាល័យរបស់លោកស្រីបាននិយាយនៅក្នុងសេចក្តីថ្លែងការណ៍មួយថា ការសន្យានេះបានធ្វើឡើងនៅមុនពេលដំណើរទស្សនកិច្ចដែលបានគ្រោងទុករបស់លោក ហ្សេលេនស្គី ទៅកាន់ទីក្រុងឡុងដ៍ ទីក្រុងព្រុចសែលនិងទីក្រុងរ៉ូម ក្នុងរយៈពេលប៉ុន្មានថ្ងៃខាងមុខ សម្រាប់កិច្ចពិភាក្សាជាមួយបណ្តាមេដឹកនាំអឺរ៉ុបអំពីដំណើរការសន្តិភាពជាមួយរុស្ស៊ី។

សេចក្តីថ្លែងការណ៍នោះបាននិយាយថា លោកស្រី ម៉េឡូនី បានសម្តែងសាមគ្គីភាពជាមួយអ៊ុយក្រែន បន្ទាប់ពីការវាយប្រហារចុងក្រោយរបស់រុស្ស៊ី។

បណ្តាក្រុមហ៊ុនរបស់អ៊ីតាលីនឹងដឹកជញ្ជូនម៉ាស៊ីនភ្លើងទៅកាន់អ៊ុយក្រែនក្នុងរយៈពេលប៉ុន្មានសប្តាហ៍ខាងមុខ «ដើម្បីគាំទ្រហេដ្ឋារចនាសម្ព័ន្ធថាមពល និងប្រជាជន»។

លោកស្រី ម៉េឡូនី ក៏បានសម្តែងការគាំទ្រចំពោះកិច្ចខិតខំប្រឹងប្រែងការទូតនាពេលបច្ចុប្បន្ន និងការប្តេជ្ញាចិត្តរបស់សហរដ្ឋអាមេរិកក្នុងការគូសផ្លូវឆ្ពោះទៅរក «សន្តិភាពដ៏យុត្តិធម៌ និងយូរអង្វែង» ផងដែរ។

សេចក្តីថ្លែងការណ៍នោះបាននិយាយថា ការត្រៀមខ្លួនរបស់អ៊ុយក្រែនក្នុងការចូលរួមក្នុងកិច្ចចរចាដោយស្មោះត្រង់នៅតែជា «ឧបករណ៍សម្រាប់ដំណើរការនេះ» ខណៈដែលបង្ហាញពីក្តីសង្ឃឹមថា ទីក្រុងម៉ូស្គូនឹងបង្ហាញពី«ភាពបើកចំហស្រដៀងគ្នា» នេះដែរ។

លោក ហ្សេលេនស្គី បាននិយាយនៅលើបណ្តាញផ្សព្វផ្សាយសង្គមអ៊ិច (X) របស់អាម៉េរិកថា លោកមាន «ការសន្ទនាដ៏សំខាន់មួយ» ជាមួយលោកស្រី ម៉េឡូនី ដោយសម្តែងការដឹងគុណចំពោះការផ្តោតការយកចិត្តទុកដាក់របស់លោកស្រីទៅលើគំនិតផ្តួចផ្តើមការទូត និងជំនួយសម្រាប់ហេដ្ឋារចនាសម្ព័ន្ធថាមពល។

លោកបាននិយាយថា «នៅមានការងារដែលត្រូវធ្វើរួមគ្នាជាច្រើនទៀតដើម្បីធានាថា រុស្ស៊ីប្ដេជ្ញាចិត្តយ៉ាងពិតប្រាកដក្នុងការបញ្ចប់សង្គ្រាម។ប្រទេសអ៊ីតាលីគាំទ្រយ៉ាងច្បាស់ចំពោះតម្រូវការសន្តិសុខពិតប្រាកដ និងសម្រាប់ការទប់ស្កាត់ការផ្ទុះឡើងវិញនៃសង្គ្រាម»។

ប្រធានាធិបតីបារាំង លោក អេមម៉ានូអ៊ែល ម៉ាក្រុន (Emmanuel Macron) បាននិយាយកាលពីពេលថ្មីៗនេះថា លោកនឹងធ្វើដំណើរទៅកាន់ទីក្រុងឡុងដ៍សម្រាប់កិច្ចពិភាក្សាកម្រិតខ្ពស់ជាមួយលោក ហ្សេលេនស្គីនាយករដ្ឋមន្ត្រីចក្រភពអង់គ្លេស លោក គ័រ ស្តាមើរ (Keir Starmer) និងអធិការបតីអាល្លឺម៉ង់ លោក ហ្រ្វីដរីច មើស (Friedrich Merz) ដើម្បីវាយតម្លៃស្ថានភាពនៅអ៊ុយក្រែន និងជំរុញកិច្ចចរចាក្រោមការសម្របសម្រួលរបស់សហរដ្ឋអាមេរិក៕

ដោយ៖ យា ចិន្តាខន្តី (ប្រភព៖ AA-AKP)