AKP ភ្នំពេញ ថ្ងៃទី០៥ ខែធ្នូ ឆ្នាំ២០២៥ -- លោកឧកញ៉ា គង់ ឫទ្ធីជព្វ ប្រធានសហព័ន្ធកីឡាទ្រីយ៉ាត្លុងកម្ពុជាអាណត្តិចាស់ ដែលទើបជាប់ឆ្នោតជាប្រធានអាណត្តិថ្មី ឆ្នាំ២០២៥-២០២៩ បានបង្ហាញពីការប្តេជ្ញាចិត្តខ្ពស់ ក្នុងការបន្តដឹកនាំសហព័ន្ធអាណត្តិថ្មីឱ្យរីកចម្រើនថែមមួយកម្រិតទៀត។

ការប្តេជ្ញាចិត្តរបស់លោកឧកញ៉ាប្រធានសហព័ន្ធបានធ្វើឡើង នៅក្នុងមហាសន្និបាតបញ្ចប់អាណត្តិចាស់ និងបន្តអាណត្តិថ្មី ឆ្នាំ២០២៥-២០២៩ នៅព្រឹកថ្ងៃទី០៥ ខែធ្នូ ឆ្នាំ២០២៥ នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ដោយមានការចូលរួមជាសក្ខីភាពពីតំណាងក្រសួងអប់រំ យុវជន និងកីឡា និងតំណាង NOCC។

លោកឧកញ៉ាប្រធានសហព័ន្ធក៏បានបង្ហាញក្តីរីករាយ និងថ្លែងអំណរគុណដល់សមាជិកទាំងអស់ដែលបានផ្តល់ទំនុកចិត្តគាំទ្រដល់រូបលោកបន្តដឹកនាំអភិវឌ្ឍន៍ជំនាញកីឡាមួយនេះ១អាណត្តិថ្មីទៀត។ លោកឧកញ៉ា គង់ ឫទ្ធីជព្វ បានជំរុញទឹកចិត្តដល់គ្រូបង្វឹក កីឡាករ កីឡាការិនីត្រៀមចូលរួមប្រកួតកីឡាស៊ីហ្គេម លើកទី៣៣ នៅថៃ ពីថ្ងៃទី០៩-២០ ខែធ្នូ ឆ្នាំ២០២៥ ឱ្យទទួលបានលទ្ធផលជាមេដាយជូនជាតិ ដើម្បីបង្ហាញសមត្ថភាពបច្ចេកទេសរបស់ប្រភេទកីឡាអូឡាំពិករបស់កម្ពុជាមួយនេះដល់អន្តរជាតិ។ តាមរយៈការប្រកួតស៊ីហ្គេម ឆ្នាំ២០២៥នេះ ក៏ជាការវាស់ស្ទង់កម្រិតសមត្ថភាពរបស់អត្តពលិកទ្រីយ៉ាត្លុងកម្ពុជា សម្រាប់ស៊ីហ្គេម លើកទី៣៤ នៅប្រទេសសិង្ហបុរី នាឆ្នាំ២០២៧ ខាងមុខផងដែរ។

ជាមួយគ្នានេះ លោក ងិន សុខបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជាបានបង្ហាញរបាយការណ៍ពេញមួយអាណត្តិចាស់រយៈពេល៤ឆ្នាំកន្លងមក ក៏ដូចជាបានបង្ហាញនូវទិសដៅ និងផែនការសម្រាប់អាណត្តិថ្មី រយៈពេល៤ឆ្នាំបន្ទាប់ ពីឆ្នាំ២០២៥-២០២៩ផងដែរ។ ជាមួយគ្នានេះ លោកលើកបង្ហាញបញ្ហាប្រឈមមួយចំនួន និងសមិទ្ធផលនានាពេញមួយអាណត្តិ រយៈពេល៤ឆ្នាំ ជាពិសេសសមិទ្ធផលមេដាយមាស ប្រាក់ ក្នុងស៊ីហ្គេម ឆ្នាំ២០២៣ ក្នុងនាមជាម្ចាស់ផ្ទះជាប្រវត្តិសាស្ត្រដំបូងផងដែរ។

អគ្គលេខាធិការ លោក ងិន សុខបញ្ញា បានលើកបង្ហាញទិសដៅ និងផែនការសម្រាប់អាណត្តិទី៥ ឆ្នាំ២០២៥-២០២៩ថា សហព័ន្ធត្រៀមចូលរួមការប្រកួតកីឡាស៊ីហ្គេមលើកទី៣៣ នាថ្ងៃទី១៤-២០ ខែធ្នូ ឆ្នាំ២០២៥ នៅប្រទេសថៃ និងខំរក្សាមេដាយមាសឱ្យបាន១គ្រឿង។ ដណ្តើមមេដាយណាមួយក្នុងការប្រកួត Asian Beach Games នៅប្រទេសចិន និង Asian Games នៅប្រទេសជប៉ុន នាឆ្នាំ២០២៦។ ប្រកួត Qualifies ដើម្បីមានសិទ្ធចូលរួម Olympic Games នៅសហរដ្ឋអាមេរិក ២០២៨។ បញ្ជូនគ្រូបង្វឹក និងមន្ត្រីបច្ចេកទេសទៅសិក្សានៅក្រៅប្រទេសឱ្យបានច្រើនជាងមុន និងខិតខំស្វែងរកដៃគូឧបត្ថម្ភបន្ថែម ដើម្បីរៀបចំការប្រកួត និងសម្ភារហ្វឹកហាត់ដល់កីឡាករ។

គួរបញ្ជាក់ថា គណៈកម្មាធិការប្រតិបត្តិ សហព័ន្ធកីឡាទ្រីយ៉ាត្លុងកម្ពុជា អាណត្តិទី៥ ឆ្នាំ២០២៥-២០២៩ មានចំនួន៩រូប ដឹកនាំដោយលោកឧកញ៉ា គង់ រិទ្ធីជព្វ ប្រធាន លោកជំទាវ ម៉ក់ វណ្ណស៊ីថា អនុប្រធាន លោកស្រីវេជ្ជបណ្ឌិត ហួត ចាន់ធានី   អនុប្រធាន លោកស្រី បេង ប៊ុននេត អនុប្រធាន លោក ងិន សុខបញ្ញា អគ្គលេខាធិការ លោក មាស សារ៉េត អគ្គលេខាធិការរង កញ្ញា កាង ណុចបវរ អគ្គហេរញ្ញិក កញ្ញា ញ៉ែម សុភា សមាជិក និងលោក សូ រ៉ាន់ឌីណូ សមាជិក៕

ដោយ ហេង ណាលីន