AKP ភ្នំពេញ ថ្ងៃទី០៥ ខែធ្នូ ឆ្នាំ២០២៥ -- ការិយាល័យរបស់ប្រធានាធិបតីកូរ៉េខាងត្បូងបាននិយាយថា លោក លី ជេម្យុង (Lee Jae Myung) បានសន្ទនាតាមទូរស័ព្ទជាលើកដំបូងជាមួយប្រធានាធិបតីរ៉ូម៉ានី លោក នីកូស័រ ដាន (Nicusor Dan) កាលពីថ្ងៃព្រហស្បតិ៍ ហើយបានពិភាក្សាអំពីវិធីជំរុញកិច្ចសហប្រតិបត្តិការក្នុងឧស្សាហកម្មការពារជាតិ ថាមពលនុយក្លេអ៊ែរ និងវិស័យផ្សេងៗទៀត។

យោងតាមអ្នកនាំពាក្យរបស់ប្រធានាធិបតី លោក គីម ណាមជូន (Kim Nam-joon) បាននិយាយនៅក្នុងសន្និសីទសារព័ត៌មានជាលាយលក្ខណ៍អក្សរមួយថា លោក លី បាននិយាយថា នេះពិតជាមានន័យណាស់ដែលការនាំចេញប្រព័ន្ធមីស៊ីលពីដីទៅលើអាកាស Shingung និងកាំភ្លើងធំស្វ័យប្រវត្តិ K9 របស់ប្រទេសកូរ៉េខាងត្បូងទៅកាន់ប្រទេសរ៉ូម៉ានី ដោយបានរួមចំណែកដល់ការពង្រឹងសមត្ថភាពការពារជាតិរបស់ប្រទេសរ៉ូម៉ានី ហើយលោកបានសម្តែងក្តីសង្ឃឹមថា ក្រុមហ៊ុនកូរ៉េខាងត្បូងនឹងបន្តដើរតួនាទីក្នុងរឿងនេះ។

លោក ដាន បានលើកសរសើរពីកម្លាំងបច្ចេកវិទ្យា និងភាពជឿជាក់នៃឧស្សាហកម្មការពារជាតិកូរ៉េខាងត្បូង ហើយលោកបានសម្តែងក្តីសង្ឃឹមថា ប្រទេសទាំងពីរនឹងធ្វើការរួមគ្នាដើម្បីបង្កើនកិច្ចសហប្រតិបត្តិការការពារជាតិបន្ថែមទៀត។

មេដឹកនាំទាំងពីរក៏បានយល់ព្រមបន្តស្វែងរកមធ្យោបាយសម្រាប់កិច្ចសហប្រតិបត្តិការក្នុងការអភិវឌ្ឍកំពង់ផែ និងហេដ្ឋារចនាសម្ព័ន្ធ ក៏ដូចជាសម្រាប់ការផ្លាស់ប្តូរប្រជាជន និងកិច្ចសហប្រតិបត្តិការវប្បធម៌ផងដែរ៕

ដោយ៖ មូល មិនា (ប្រភព៖ យ៉ុនហាប់)