AKP ភ្នំពេញ ថ្ងៃទី០៤ ខែធ្នូ ឆ្នាំ២០២៥ -- កាកបាទក្រហមសិង្ហបុរី (SRC) បានសន្យាផ្តល់ជំនួយចំនួន ២៥០.០០០ដុល្លារសិង្ហបុរី (ប្រហែល១៩០.០០០ដុល្លារអាម៉េរិក) ដល់សមាគមជាតិចំនួនប្រាំនៅក្នុងតំបន់ ជាកន្លែងដែលសហគមន៍នានាបានរងផលប៉ះពាល់យ៉ាងធ្ងន់ធ្ងរដោយសារគ្រោះទឹកជំនន់នាពេលថ្មីៗនេះ។

សមាគមកាកបាទក្រហមស្រីលង្កា (SLRCS) កាកបាទក្រហមឥណ្ឌូណេស៊ី (PMI) អឌ្ឍចន្ទក្រហមម៉ាឡេស៊ី (MRC) សមាគមកាកបាទក្រហមថៃ (TRCS) និងកាកបាទក្រហមវៀតណាម (VNRC) នឹងទទួលបានជំនួយចំនួន ៥០.០០០ដុល្លារសិង្ហបុរី (៣៨.៦០០ល្លារអាម៉េរិក) រៀងៗខ្លួន ដើម្បីគាំទ្រដល់កិច្ចខិតខំប្រឹងប្រែងសង្គ្រោះ និងស្តារឡើងវិញជាបន្ទាន់។ នេះបើយោងតាមសេចក្តីប្រកាសព័ត៌មានរបស់ SRC កាលពីថ្ងៃទី០១ ខែធ្នូ ឆ្នាំ២០២៥។

ភ្លៀងមូសុងធ្ងន់ធ្ងរ ព្យុះត្រូពិច និងព្យុះស៊ីក្លូនបានបង្កឱ្យមានទឹកជំនន់និងការរអិលបាក់ដីយ៉ាងច្រើននៅទូទាំងតំបន់អាស៊ីអាគ្នេយ៍ និងស្រីលង្កាដែលបណ្តាលឱ្យបាត់បង់ជីវិត ការផ្លាស់ទីលំនៅយ៉ាងច្រើន ការបំផ្លាញផ្ទះសម្បែង និងការខូចខាតដល់ហេដ្ឋារចនាសម្ព័ន្ធសំខាន់ៗ។

SRC បាននិយាយថា សមាគមជាតិកំពុងឆ្លើយតបយ៉ាងសកម្មនៅនឹងកន្លែង។ តាមរយៈសាខាខេត្ត និងស្រុករបស់ពួកគេ ពួកគេកំពុងធ្វើការជាមួយអាជ្ញាធរមូលដ្ឋានដើម្បីដំណើរការមជ្ឈមណ្ឌលសង្គ្រោះជួយក្នុងការជម្លៀសផ្តល់ជំនួយសង្គ្រោះបន្ទាន់ដូចជា អាហារ ទឹកស្អាត និងសម្ភារៈចាំបាច់ គាំទ្រប្រតិបត្តិការសម្អាត និងធ្វើកិច្ចខិតខំប្រឹងប្រែងស្វែងរក និងជួយសង្គ្រោះនៅក្នុងតំបន់ដែលរងគ្រោះខ្លាំងបំផុត៕

ដោយ៖ យា ចិន្តាខន្តី (ប្រភព៖ VNA)