EN 
FR 
AR
CNវិមានក្រឹមឡាំង៖ កិច្ចពិភាក្សារវាងលោក ពូទីន និងលោក វីតកូហ្វ ផ្តោតសំខាន់ទៅលើគំនិតផ្តួចផ្តើមដំណោះស្រាយរវាងសហរដ្ឋអាមេរិក និងអ៊ុយក្រែន
AKP ភ្នំពេញ ថ្ងៃទី០៣ ខែធ្នូ ឆ្នាំ២០២៥ -- លោក ឌីមីទ្រី ប៉េសកូវ (Dmitry Peskov) អ្នកនាំពាក្យវិមានក្រឹមឡាំង បាននិយាយថា ប្រធានាធិបតីរុស្ស៊ីលោក វ្ល៉ាឌីមៀ ពូទីន (Vladimir Putin) និងលោក ស្ទីវ វីតកូហ្វ (Steve Witkoff) បេសកជនពិសេសរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) នឹងពិភាក្សាគ្នាអំពីការយោគយល់គ្នាដែលសម្រេចបានរវាងទីក្រុងវ៉ាស៊ីនតោន និងទីក្រុងគៀវ ស្តីពីដំណោះស្រាយដែលអាចកើតមាន។
លោក ប៉េសកូវ បានប្រាប់ប្រព័ន្ធផ្សព្វផ្សាយក្នុងអំឡុងពេលសន្និសីទសារព័ត៌មានមួយដែលរៀបចំដោយសារព័ត៌មានស្ពុតនីកឥណ្ឌា (Sputnik India) ថា «លោកប្រធានាធិបតី ពូទីន និងលោក វីតកូហ្វ នឹងមានឱកាសពិនិត្យមើលឡើងវិញនូវការយោគយល់គ្នា ដែលសម្រេចបានរវាងទីក្រុងគៀវ និងទីក្រុងវ៉ាស៊ីនតោន ទាក់ទងនឹងមធ្យោបាយដែលអាចធ្វើទៅបានឆ្ពោះទៅរកដំណោះស្រាយ»។
លោក ពូទីន និងលោក វីតកូហ្វ គ្រោងនឹងជួបគ្នាក្នុងរយៈពេលប្រាំម៉ោង បន្ទាប់ពីអ្វីដែលអ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov) បាននិយាយថា គឺជា «ការងារដ៏លំបាកក្នុងរយៈពេលប៉ន្មានសប្តាហ៍កន្លងមកនេះ» រវាងភាគីអាម៉េរិក និងអ៊ុយក្រែន។
លោក ប៉េសកូវ បានកត់សម្គាល់ថា ទីក្រុងម៉ូស្គូឱ្យតម្លៃចំពោះកិច្ចខិតខំប្រឹងប្រែងរបស់រដ្ឋបាលលោក ត្រាំ ក្នុងការជំរុញដំណោះស្រាយនយោបាយ និងការទូតចំពោះជម្លោះអ៊ុយក្រែន។
លោកបាននិយាយថា «យើងសូមកោតសរសើរចំពោះកិច្ចខិតខំប្រឹងប្រែងរបស់រដ្ឋបាលសហរដ្ឋអាមេរិកក្នុងការបើកផ្លូវមួយឆ្ពោះទៅរកការដោះស្រាយវិបត្តិអ៊ុយក្រែនតាមរយៈមធ្យោបាយនយោបាយ និងការទូត»។
លោកក៏បានសង្កត់ធ្ងន់ទៅលើការកោតសរសើររបស់រុស្ស៊ីចំពោះតួនាទីស្ថាបនារបស់ឥណ្ឌាផងដែរ។
លោក ប៉េសកូវ បានថ្លែងថា «ទីក្រុងម៉ូស្គូស្វាគមន៍ចំពោះការត្រៀមខ្លួនរបស់ទីក្រុងញូវដេលីក្នុងការចូលរួមចំណែកក្នុងការដោះស្រាយជម្លោះដ៏ស្មុគស្មាញនេះដោយសន្តិវិធី» ដោយលោកបានបន្ថែមថា រុស្ស៊ីគោរពគោលជំហររបស់ឥណ្ឌា ស្តីពីដំណោះស្រាយអ៊ុយក្រែន៕
ដោយ៖ យា ចិន្តាខន្តី (ប្រភព៖ ស្ពុតនីក)
