AKP ភ្នំពេញ ថ្ងៃទី០២ ខែធ្នូ ឆ្នាំ២០២៥ -- លោក ស្ទីវ វីតកូហ្វ (Steve Witkoff) បេសកជនពិសេសរបស់សហរដ្ឋអាមេរិក បានធ្វើដំណើរទៅកាន់ទីក្រុងម៉ូស្គូកាលពីថ្ងៃចន្ទ ដើម្បីជួបជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) ដើម្បីពិភាក្សាអំពីផែនការសន្តិភាពសម្រាប់បញ្ចប់សង្គ្រាមនៅអ៊ុយក្រែន។ នេះបើយោងតាមមន្ត្រីអាម៉េរិកម្នាក់ដែលបាននិយាយទៅកាន់សារព័ត៌មាន Fox News។

ដំណើរទស្សនកិច្ចរបស់លោកនេះបានកើតឡើង ខណៈដែលកិច្ចចរចារវាងអ៊ុយក្រែន និងរុស្ស៊ីហាក់ដូចជាកំពុងមានវឌ្ឍនភាព ដោយសេតវិមានកំពុងលើកកម្ពស់សំណើសន្តិភាពដែលមានគោលបំណងបញ្ចប់ជម្លោះដែលមានរយៈពេលជិតបួនឆ្នាំនេះ។

កាលពីថ្ងៃអាទិត្យ លោក វីតកូហ្វ ដែលជាអ្នកដើរតួនាទីយ៉ាងសំខាន់ក្នុងការសម្របសម្រួលបទឈប់បាញ់រវាងអ៊ីស្រាអែល និងក្រុមហាម៉ាស់ប៉ាឡេស្ទីន បានជួបជាមួយក្រុមអ្នកចរចាអ៊ុយក្រែននៅរដ្ឋផ្លរីដា រួមជាមួយរដ្ឋមន្ត្រីការបរទេសសហរដ្ឋ លោក ម៉ាកូ រូប៊ីអូ (Marco Rubio) និងទីប្រឹក្សាជាន់ខ្ពស់ លោក ចារ៉េដ គូស្សន័រ (Jared Kushner)។

លោក រូប៊ីអូ បានកំណត់លក្ខណៈនៃកិច្ចពិភាក្សាថា «មានផលិតភាពខ្ពស់»។ នៅក្នុងសេចក្តីថ្លែងការណ៍មួយ លោកបានសង្កត់ធ្ងន់ថាគោលបំណង គឺ «មិនមែនគ្រាន់តែជាការបញ្ចប់សង្គ្រាមនោះទេ»។

លោក រូប៊ីអូ បាននិយាយថា «ជាក់ស្តែង នោះជារឿងសំខាន់ និងជាមូលដ្ឋាន។ យើងចង់ឃើញទីបញ្ចប់នៃការសម្លាប់ ការស្លាប់ និងទុក្ខវេទនាហើយខ្ញុំប្រាកដថាភាគីអ៊ុយក្រែន ពួកគេក៏ធ្វើដូច្នោះដែរ»។

លោកបានបន្ថែមថា «ពួកគេចង់បានសន្តិភាព។ ប៉ុន្តែវាក៏និយាយអំពីការធានានូវការបញ្ចប់សង្គ្រាមដែលធ្វើឱ្យអ៊ុយក្រែនមានអធិបតេយ្យភាព និងឯករាជ្យ និងមានឱកាសទទួលបានវិបុលភាពពិតប្រាកដដែរ»៕

ដោយ៖ យា ចិន្តាខន្តី (ប្រភព៖ AA-AKP)