AKP ភ្នំពេញ ថ្ងៃទី០២ ខែធ្នូ ឆ្នាំ២០២៥ -- អាកាសធាតុអាក្រក់នៅតែបន្តវាយប្រហារប្រទេសយ៉ាងហោចណាស់ចំនួនបួននៅតំបន់អាស៊ីខាងត្បូង និងអាស៊ីអាគ្នេយ៍ ដោយមានមនុស្សជាង ១.០០០នាក់បានស្លាប់ និងប្រហែល៨៣៤នាក់កំពុងបាត់ខ្លួន ខណៈដែលប្រតិបត្តិការស្វែងរក និងជួយសង្គ្រោះកំពុងតែបន្ត។ នេះបើយោងតាមទិន្នន័យដែលត្រូវបានចែករំលែកដោយរដ្ឋាភិបាលរបស់ប្រទេសទាំងនោះ។

គ្រោះទឹកជំនន់ ការរអិលបាក់ដី ព្យុះ និងព្យុះស៊ីក្លូនដែលមិនធ្លាប់មានពីមុនមក បានបង្កការបំផ្លិចបំផ្លាញនៅទូទាំងប្រទេសឥណ្ឌូណេស៊ី ម៉ាឡេស៊ីស្រីលង្កា និងថៃ ហើយអាជ្ញាធរកំពុងប្រណាំងប្រជែងនឹងពេលវេលាដើម្បីជួយសង្គ្រោះសហគមន៍ដែលកំពុងជាប់គាំង ផ្តល់ជំនួយសង្គ្រោះបន្ទាន់ និងវាយតម្លៃការបំផ្លិចបំផ្លាញ។

នៅក្នុងប្រទេសឥណ្ឌូណេស៊ី ទីភ្នាក់ងារគ្រប់គ្រងគ្រោះមហន្តរាយជាតិបានរាយការណ៍ថា គ្រោះទឹកជំនន់ និងការរអិលបាក់ដីនៅកោះស៊ូម៉ាត្រាតែមួយ បានឆក់យកជីវិតមនុស្សចំនួន ៥៩៣នាក់ និងមានមនុស្សចំនួន៤៦៨នាក់កំពុងបាត់ខ្លួន។

កោះស៊ូម៉ាត្រាខាងជើងបានកត់ត្រាអ្នកស្លាប់ចំនួន ២១៧នាក់ និងបាត់ខ្លួនចំនួន ២០៩នាក់ ខណៈដែលនៅកោះស៊ូម៉ាត្រាខាងលិច មានអ្នកស្លាប់ចំនួន ១២៩នាក់ និងមនុស្ស ១១៨នាក់នៅតែបាត់ខ្លួន ហើយនៅក្នុងខេត្តអាឆេ មនុស្សចំនួន ៩៦នាក់បានស្លាប់ និង ៧៥នាក់ផ្សេងទៀតនៅមិនទាន់រាប់បញ្ចូលនៅឡើយ។

ផ្ទះរាប់រយខ្នងត្រូវបានខូចខាត មនុស្សចំនួន ១,១លាននាក់រងផលប៉ះពាល់ និងជាង ២៩០.០០០នាក់ត្រូវបានផ្លាស់ទីលំនៅ ខណៈដែលក្រុមស្វែងរក និងជួយសង្គ្រោះកំពុងបន្តប្រតិបត្តិការសម្រាប់ស្វែងរកមនុស្សដែលកំពុងបាត់ខ្លួននៅក្នុងតំបន់ផ្សេងៗគ្នា។

ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូប៊ីអាន់តូ (PrabowoSubianto) បានទៅទស្សនកិច្ចនៅតំបន់ដែលរងផលប៉ះពាល់កាលពីថ្ងៃចន្ទហើយបានបញ្ជាឱ្យដាក់ពង្រាយកងកម្លាំងជាតិទាំងអស់ រួមទាំងយោធាផងដែរ ដើម្បីពន្លឿនការឆ្លើយតបក្នុងគ្រាអាសន្ន។

លោក ប្រាបូវ៉ូ កំពុងស្ថិតនៅក្រោមសម្ពាធក្នុងការប្រកាសអាសន្នជាតិ។ទោះជាយ៉ាងណាក៏ដោយ លោកបាននិយាយថា ស្ថានភាពអាក្រក់បំផុតបានកន្លងផុតទៅហើយ ហើយអាទិភាពរបស់រដ្ឋាភិបាល គឺការផ្តល់ជំនួយឱ្យបានឆាប់រហ័សដល់អ្នកដែលរងផលប៉ះពាល់។

គ្រោះមហន្តរាយនេះ គឺជាគ្រោះមហន្តរាយដ៏សាហាវបំផុតរបស់ប្រទេសឥណ្ឌូណេស៊ីចាប់តាំងពីឆ្នាំ២០១៨ មក នៅពេលដែលមានគ្រោះរញ្ជួយដី និងរលកយក្សស៊ូណាមិដ៏ធំមួយនៅកោះស៊ូឡាវេស៊ី ដែលបានសម្លាប់មនុស្សជាង ២.០០០នាក់៕

ដោយ៖ យា ចិន្តាខន្តី (ប្រភព៖ AA-AKP)