AKP ភ្នំពេញ ថ្ងៃទី០១ ខែធ្នូ ឆ្នាំ២០២៥ -- ប្រទេសហុងគ្រីអនុវត្តគោលនយោបាយការបរទេសឯករាជ្យ ហើយមិនត្រូវការការអនុញ្ញាតពីសហភាពអឺរ៉ុបដើម្បីជជែកពិភាក្សាជាមួយរុស្ស៊ីទេ។ រដ្ឋមន្ត្រីការបរទេសហុងគ្រី លោក ភែតទ័រ អេសហ្សីជចាតូ (Peter Szijjarto)បានបញ្ជាក់ខាងលើនេះ ដោយឆ្លើយតបទៅនឹងការអត្ថាធិប្បាយរបស់អធិការបតីអាល្លឺម៉ង់ លោក ហ្រ្វីដរីជ មើស (Friedrich Merz) ដែលបាននិយាយថា នាយករដ្ឋមន្ត្រីហុងគ្រី លោក វីកតូ អ័រប៊ែន (Viktor Orban)បានទៅទស្សនកិច្ចនៅទីក្រុងម៉ូស្គូដោយគ្មានការយល់ព្រមពីសហភាពអឺរ៉ុប។

លោកបានសរសេរនៅលើទំព័រហ្វេសប៊ុករបស់លោកថា «យើងប្រជាជនហុងគ្រី មិនត្រូវការការអនុញ្ញាត ឬអាណត្តិពីទីក្រុងព្រុចសែលទីក្រុងប៊ែរឡាំង ឬនរណាម្នាក់ផ្សេងទៀតដើម្បីចូលរួមក្នុងកិច្ចចរចានៅបរទេសទេ។ មិនថាទីក្រុងព្រុចសែលចូលចិត្តឬអត់នោះទេ យើងបន្តគោលនយោបាយការបរទេសអធិបតេយ្យភាព ហើយការសម្រេចចិត្តរបស់យើងត្រូវបានកំណត់ដោយផលប្រយោជន៍ជាតិ»។

នៅថ្ងៃទី២៨ ខែវិច្ឆិកា ឆ្នាំ២០២៥ នៅពេលចាប់ផ្តើមកិច្ចប្រជុំជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) នៅវិមានក្រឹមឡាំង ដោយលោក អ័រប៊ែន ក៏បាននិយាយផងដែរថា ប្រទេសហុងគ្រីបន្តគោលនយោបាយការបរទេសឯករាជ្យ ដោយមិនចុះចាញ់នឹងសម្ពាធពីខាងក្រៅទេ ហើយនឹងបន្តសហការជាមួយរុស្ស៊ីក្នុងវិស័យជាច្រើន៕

ដោយ៖ យា ចិន្តាខន្តី (ប្រភព៖ តាសស៍)