AKP ភ្នំពេញ ថ្ងៃទី០១ ខែធ្នូ ឆ្នាំ២០២៥ -- ក្នុងអំឡុងពេលនៃកិច្ចសន្ទនាតាមទូរស័ព្ទមួយ ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បាននិយាយទៅកាន់មេដឹកនាំវេណេស៊ុយអេឡា លោក នីកូឡាសម៉ាឌូរ៉ូ (Nicolas Maduro) ថា ទីក្រុងវ៉ាស៊ីនតោនអាចពិចារណាក្នុងការប្រើប្រាស់កម្លាំង ប្រសិនបើលោកមិនចាកចេញពីតំណែងដោយស្ម័គ្រចិត្តទេនោះ។ នេះបើយោងតាមការចុះផ្សាយរបស់កាសែត TheWall Street Journal (WSJ) ដែលដកស្រង់ពីប្រភពមួយរបស់ខ្លួន។

យោងតាមប្រភពនោះ បានឱ្យដឹងថា លោក ត្រាំ បានប្រាប់លោក ម៉ាឌូរ៉ូ កាលពីសប្តាហ៍មុនថា «ប្រសិនបើលោកមិនចាកចេញពីអំណាចដោយស្ម័គ្រចិត្តទេ» សហរដ្ឋអាមេរិកនឹងពិចារណាជម្រើសផ្សេងៗប្រឆាំងនឹងប្រទេសវេណេស៊ុយអេឡា រួមទាំងការប្រើប្រាស់កម្លាំងផងដែរ។ ការចេញផ្សាយនេះបានអះអាងថា មេដឹកនាំទាំងពីរក៏បានពិភាក្សាគ្នាអំពីការលើកលែងទោសដែលអាចធ្វើទៅបានសម្រាប់លោក ម៉ាឌូរ៉ូ និងក្រុមផ្នែកខាងក្នុងរបស់លោកផងដែរ។

ក្នុងអំឡុងពេលអាណត្តិដំបូងរបស់លោក ត្រាំ កាលពីក្នុងខែមីនាឆ្នាំ២០២០ សហរដ្ឋអាមេរិកបានចោទប្រកាន់លោក ម៉ាឌូរ៉ូ និងមន្ត្រីរដ្ឋាភិបាលមួយចំនួនទៀតពីបទភេរវកម្មគ្រឿងញៀន និងបានផ្តល់ប្រាក់រង្វាន់ចំនួន១៥លានដុល្លារអាម៉េរិកសម្រាប់ព័ត៌មានដែលនាំឱ្យមានការចាប់ខ្លួន និង/ឬការកាត់ទោសប្រធានាធិបតីវេណេស៊ុយអេឡារូបនេះ។ នៅដើមខែសីហាឆ្នាំនេះ ទីក្រុងវ៉ាស៊ីនតោនបានបង្កើនប្រាក់រង្វាន់ដល់ ៥០លានដុល្លារអាម៉េរិកសម្រាប់ព័ត៌មានដែលនាំឱ្យមានការចាប់ខ្លួនលោក ម៉ាឌូរ៉ូ។ យោងតាមក្រសួងយុត្តិធម៌សហរដហឋអាមេរិក បានឱ្យដឹងថា មេដឹកនាំវេណេស៊ុយអេឡារូបនេះ «គឺជាអ្នកជួញដូរគ្រឿងញៀនធំជាងគេបំផុតម្នាក់របស់ពិភពលោក» ហើយត្រូវបានចោទប្រកាន់ថា «បានបង្កការគំរាមកំហែងដល់សន្តិសុខជាតិ» របស់សហរដ្ឋអាមេរិក។

ប្រព័ន្ធផ្សព្វផ្សាយអាម៉េរិកបានរាយការណ៍ម្តងហើយម្តងទៀតថាសហរដ្ឋអាមេរិកអាចនឹងចាប់ផ្តើមវាយប្រហារលើទឹកដីវេណេស៊ុយអេឡាក្នុងពេលឆាប់ៗនេះ។ កាលពីថ្ងៃព្រហស្បតិ៍ សប្តាហ៍មុន លោក ត្រាំ បាននិយាយថា ទីក្រុងវ៉ាស៊ីនតោននឹងចាប់ផ្តើមប្រយុទ្ធប្រឆាំងនឹងការជួញដូរគ្រឿងញៀននៅលើដីពីប្រទេសវេណេស៊ុយអេឡាក្នុងពេលឆាប់ៗនេះ ប៉ុន្តែមិនបានផ្តល់ព័ត៌មានលម្អិតអំពីប្រតិបត្តិការយោធាដែលអាចកើតមាននោះទេ។ កាលពីថ្ងៃសៅរ៍ មេដឹកនាំអាម៉េរិកបានអំពាវនាវឱ្យបិទដែនអាកាសលើនិងជុំវិញប្រទេសវេណេស៊ុយអេឡាទាំងស្រុង៕

ដោយ៖ យា ចិន្តាខន្តី (ប្រភព៖ តាសស៍)