AKP ភ្នំពេញ ថ្ងៃទី០១ ខែធ្នូ ឆ្នាំ២០២៥ -- ក្រុមនារីជម្រើសជាតិប៊ុលហ្គារីបានឈ្នះពានរង្វាន់នៅក្នុងការប្រកួតជាក្រុមនៃការប្រកួតជើងឯកកាយសម្ព័ន្ធពិភពលោក ដែលបានបញ្ចប់នៅកីឡដ្ឋាន SamElyon ក្នុងទីក្រុងសាម៉ូកូវនៅភាគនិរតីនៃប្រទេសប៊ុលហ្គារី។

កីឡាការិនី ការីណា ណេយកូវ៉ា (Karina Neykova) កីឡាការិនី ស៊ីយ៉ាណា​តាបាកូវ៉ា (Siyana Tabakova) កីឡាការិនី រីសទីអាណា កូវ៉ាឆេវ៉ា(Hristiana Kovacheva) កីឡាការិនី វីកតូរីយ៉ា បឺរ៉ូវ៉ា (Viktoria Berova) កីឡាការិនី យ៉ាណា ស្តេយកូវ៉ា (Yana Staykova) កីឡាការិនី ម៉ារីយ៉ា​មេឡេម៉ូវ៉ (Maria Mehlemova) និងកីឡាការិនី កាទ្រីន តាសេវ៉ា (KatrinTaseva) បានសម្តែងយ៉ាងលេចធ្លោដើម្បីដណ្តើមពានរង្វាន់ពិភពលោកលើកទីពីររបស់ពួកគេបន្ទាប់ពីការប្រកួត Graz 2022។ មេដាយមាសនេះទទួលបាន បន្ទាប់ពីពានរង្វាន់ជើងឯកអឺរ៉ុបរបស់ពួកគេកាលពីដើមឆ្នាំនេះនៅក្នុងប្រទេសហុងគ្រី។

ក្រោមការបង្វឹករបស់គ្រូបង្វឹក លោកស្រី គ្រីស្ទីណា តាស្សេវ៉ា(Kristina Tasheva) ក្រុមកាឡាការិនីនេះទទួលបានពិន្ទុសរុបចំនួន៥៨,៧០០ពិន្ទុ ដោយទទួលបាន ២៩,២៥០ពិន្ទុនៅថ្ងៃសៅរ៍ និង ២៩,៤៥០ពិន្ទុនៅថ្ងៃអាទិត្យ។

ក្លឹបអាកាដឺមីក (Akademik) ​ប៊ុលហ្គារី បាន​ឈរ​នៅ​លេខ​រៀង​ទី​ប្រាំពីរ​ជាមួយ​ក្រុម JWCPE AGG របស់​ជប៉ុន ដោយ​ក្រុម​ទាំងពីរបាន​បញ្ចប់​ដោយ​មាន ៥២,៨៥០ពិន្ទុ។

ក្រុមសរុបចំនួន ៧៧ក្រុមបានចូលរួមប្រកួតប្រជែងក្នុងប្រភេទនារី និងយុវជន នៅក្នុងការប្រកួតជើងឯកពិភពលោកនៅទីក្រុងសាម៉ូកូវ។

ការប្រកួតជើងឯកពិភពលោកលើកក្រោយនឹងធ្វើឡើងនៅទីក្រុងអូសាការបស់ប្រទេសជប៉ុននៅឆ្នាំក្រោយ៕

ដោយ៖ យា ចិន្តាខន្តី (ប្រភព៖ BTA)