AKP ភ្នំពេញ ថ្ងៃទី០១ ខែធ្នូ ឆ្នាំ២០២៥ -- មូលនិធិរូបិយវត្ថុអន្តរជាតិ (IMF) បានព្យាករណ៍ថា សេដ្ឋកិច្ចរបស់ប្រទេសឡាវនឹងកើនឡើង ៤,៥% នៅក្នុងឆ្នាំ២០២៦ ដែលគាំទ្រដោយការនាំចេញកាន់តែរឹងមាំ ការកើនឡើងនៃវិស័យទេសចរណ៍ ការវិនិយោគផ្ទាល់ពីបរទេស និងគោលជំហរសារពើពន្ធដែលមានលក្ខណៈអំណោយផល។

ទោះបីជាមានសូចនាករគួរឱ្យលើកទឹកចិត្តនេះក៏ដោយ ក៏ IMF បានព្រមានថា ហានិភ័យជាច្រើននៅតែបន្តកើតមាន។ សម្ពាធសកលលោក និងក្នុងស្រុក រួមទាំងភាពតានតឹងផ្នែកភូមិសាស្ត្រនយោបាយ ភាពប្រែប្រួលនៃទីផ្សារទំនិញ និងហិរញ្ញវត្ថុ ការផ្លាស់ប្តូរគោលនយោបាយ និងគ្រោះមហន្តរាយធម្មជាតិ អាចជះឥទ្ធិពលដល់សេដ្ឋកិច្ច។

ស្ថាប័ននេះក៏បានចង្អុលបង្ហាញផងដែរថា ធនាគារមួយចំនួននៅតែងាយរងគ្រោះដោយសារតែប្រាក់ចំណេញ និងសាច់ប្រាក់ងាយស្រួលចុះខ្សោយ។ ទោះជាយ៉ាងណាក៏ដោយ វាបាននិយាយថា ការធ្វើសមាហរណកម្មក្នុងតំបន់កាន់តែច្រើន ប្រសិនបើត្រូវបានគ្រប់គ្រងប្រកបដោយប្រសិទ្ធភាព នឹងអាចជួយជំរុញកំណើន និងជួយរក្សាស្ថិរភាពខាងក្រៅក្នុងរយៈពេលមធ្យម។

ដោយសម្លឹងមើលទៅមុខ IMF បានសង្កត់ធ្ងន់ថា ប្រទេសឡាវត្រូវតែដោះស្រាយបញ្ហាប្រឈមនៃរចនាសម្ព័ន្ធដែលកាន់តែស៊ីជម្រៅ ដើម្បីជំរុញកំណើនរយៈពេលវែង។ វាបានបញ្ជាក់ពីសារៈសំខាន់នៃអភិបាលកិច្ចកាន់តែប្រសើរ ការអភិវឌ្ឍធនធានមនុស្សឱ្យកាន់តែរឹងមាំ និងបរិយាកាសអាជីវកម្មដែលគាំទ្រកាន់តែច្រើន។

វិធានការដែលបានណែនាំរួមមាន ការបង្កើនតម្លាភាព ការកែលម្អការសម្របសម្រួលក្នុងចំណោមភ្នាក់ងាររដ្ឋាភិបាល ការធានាការប្រមូលទិន្នន័យដែលអាចទុកចិត្តបាន និងការពង្រីកការចូលមើលព័ត៌មានរបស់សាធារណជន។ IMF ក៏បានជំរុញឱ្យរដ្ឋាភិបាលឡាវជំរុញកំណែទម្រង់បទប្បញ្ញត្តិ ពង្រឹងកិច្ចខិតខំប្រឹងប្រែងប្រឆាំងអំពើពុករលួយ និងរៀបចំរចនាសម្ព័ន្ធសហគ្រាសរដ្ឋឡើងវិញ៕

ដោយ៖ យា ចិន្តាខន្តី (ប្រភព៖ VNA)