AKP ភ្នំពេញ ថ្ងៃទី០១ ខែធ្នូ ឆ្នាំ២០២៥ -- នាយសេនាធិការចម្រុះ (JCS) លោក ជីន យ៉ុងស៊ុង (Jin Yong-sung) ប្រធានក្រុមប្រឹក្សាភិបាល បានធ្វើការសន្ទនាតាមទូរស័ព្ទលើកដំបូងជាមួយសមភាគីកាណាដា ហើយបានពិភាក្សាអំពីវិធីពង្រឹងកិច្ចសហប្រតិបត្តិការការពារជាតិទ្វេភាគី។

នៅក្នុងការសន្ទនាតាមទូរស័ព្ទជាមួយលោកស្រី ជេននី ការីហ្គណាន(Jennie Carignan) លោក ជីន បានថ្លែងអំណរគុណដល់ប្រទេសកាណាដាចំពោះកិច្ចខិតខំប្រឹងប្រែងរបស់ខ្លួនក្នុងការចូលរួមចំណែកក្នុងការរក្សាសន្តិភាពនៅលើឧបទ្វីបកូរ៉េ និងនៅក្នុងតំបន់ឥណ្ឌូ-ប៉ាស៊ីហ្វិក រួមទាំងការចូលរួមរបស់កងទ័ពកាណាដានៅក្នុងសង្គ្រាមកូរ៉េឆ្នាំ១៩៥០-៥៣។

លោក ជីន បានពិពណ៌នាអំពីប្រទេសកាណាដាថាជា «មិត្តចាស់»របស់ប្រទេសកូរ៉េខាងត្បូង ដោយលោកបានហៅចំណងមិត្តភាពទ្វេភាគីនេះថា «សម្ព័ន្ធភាពដែលបង្កើតឡើងដោយឈាម»។

ប្រធាន JCS បានគូសបញ្ជាក់ពីសារៈសំខាន់នៃការបង្កើនកិច្ចសហប្រតិបត្តិការការពារជាតិរវាងប្រទេសទាំងពីរ ដើម្បីជំរុញផលប្រយោជន៍ជាយុទ្ធសាស្ត្ររួមរបស់ពួកគេ រួមទាំងតាមរយៈការផ្លាស់ប្តូរមន្ដ្រី និងសមយុទ្ធរួមគ្នា។

ភាគីទាំងពីរបានព្រមព្រៀងគ្នាធ្វើឱ្យកិច្ចសហប្រតិបត្តិការការពារជាតិរបស់ពួកគេកាន់តែស៊ីជម្រៅ និងជួបពិភាក្សាគ្នាផ្ទាល់នៅពេលក្រោយដើម្បីសន្តិភាព និងស្ថិរភាពនៅក្នុងតំបន់៕

ដោយ៖ មូល មិនា (ប្រភព៖ យ៉ុនហាប់)