AKP ភ្នំពេញ ថ្ងៃទី២៨ ខែវិច្ឆិកា ឆ្នាំ ២០២៥--- សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ មានចំនួន៦ជំពូកនិង១៥មាត្រាត្រូវបានសមាជិករដ្ឋសភាលើកដៃអនុម័តជាស្ថាពរបន្ទាប់មានការសួរជជែកពីសមាជិករដ្ឋសភា និងមានបកស្រាយពីតំណាងរាជរដ្ឋាភិបាល។

សេចក្តីព្រាងច្បាប់នេះត្រូវបានរដ្ឋសភាអនុម័តនៅសម័យប្រជុំពេញអង្គរដ្ឋសភាលើកទី៥ នីតិកាលទី៧ នាព្រឹកថ្ងៃទី២៨ វិច្ឆិកា  ឆ្នាំ២០២៥ ក្រោមអធិបតីភាបសម្តេចរដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាចាណាចក្រកម្ពុជា។ 

សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៦ ត្រូវបានរៀបចំឡើងដោយបានគិតគូរជាពិសេស ដើម្បីសម្រេចឱ្យបានជាអតិបរមា នូវគោលដៅជាយុទ្ធសាស្ត្រទាំង៥ ដូចមានចែងក្នុងយុទ្ធសាស្ត្របញ្ចកោណដំណាក់ កាលទី១ ដើម្បីកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ ដែលជារបៀបវារៈគោលនយោបាយ សង្គម សេដ្ឋកិច្ច និងកម្មវិធី នយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា។

សេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ ២០២៦ មានគោលបំណង ដោយផ្តល់អាទិភាពលើការ ពង្រឹងសមត្ថភាពការពារអធិបតេយ្យជាតិ និងបូរណភាពទឹកដី ការទ្រទ្រង់និរន្តរភាពនៃកិច្ចប្រតិបត្តិការរបស់ស្ថាប័នរដ្ឋ ការគាំទ្រការអនុវត្តអាទិភាពគោលនយោបាយសំខាន់ៗ ព្រមទាំងវិធានការកែទម្រង់គន្លឹះ និងជាក់ស្តែងនានា ដែលត្រូវ បន្តអនុវត្តនៅក្នុងឆ្នាំ២០២៦ ។

ទៀតសោតសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២៦ មានគោលបំណងសំខាន់ចំនួន៣ គឺ (១)-ការ គាំទ្រការផ្សារភ្ជាប់ថវិកាទៅនឹងគោលនយោបាយអាទិភាពរបស់រាជរដ្ឋាភិបាល (២)-ការពង្រឹងប្រសិទ្ធភាពនៃការ ប្រមូលចំណូល និងការវិភាជថវិកា និង (៣)- ការចូលរួមធានា ឱ្យបាននូវស្ថិរភាពម៉ាក្រូសេដ្ឋកិច្ច និងចីរភាពហិរញ្ញវត្ថុ សាធារណៈ។សេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២៦ មានចំនួន៦ជំពូក ចែកចេញជា១៥មាត្រា។ ក្នុងសម័យប្រជុំឯកឧត្តម ឈាង វុន ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា ជា អ្នករាយការណ៍ពីលទ្ធផល នៃការពិនិត្យសិក្សាសេចក្តីព្រាងច្បាប់នេះ។

-ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាតំណាងរាជរដ្ឋាភិបាល និងសហការី ជាអ្នកការពារសេចក្តីព្រាងច្បាប់។

សេចក្តីព្រាងច្បាប់នេះផងដែរមានសមាជិករដ្ឋសភាដែលបានឡើងមានមតិ ក្នុងការពិភាក្សាសេចក្តីព្រាងច្បាប់នេះ មានចំនួន៤រូប គឺ លោកជំទាវ កុល ធារិន តំណាងរាស្ត្រមណ្ឌលខេត្តកំពង់ចាម ឯកឧត្តម លឿន រ៉ាដែន តំណាងរាស្ត្រមណ្ឌលខេត្ត កំពង់ចាម លោកជំទាវ អ៊ុន សុគន្ធា តំណាងរាស្ត្រមណ្ឌលខេត្តកំពត និងឯកឧត្តម ទី សុគន្ធ តំណាងរាស្ត្រ មណ្ឌលខេត្តកណ្តាល។

ក្រោយមានការលើកឡើងពីសមាជិករដ្ឋសភារួចអង្គសភាបានអនុម័តលើសេចក្តីព្រាងច្បាប់នេះទាំងមូល មានចំនួន ១០៨សំឡេង នៃចំនួនសមាជិក រដ្ឋសភាទាំងមូល៕

ដោយ៖ ប៊ុនរិទ្ធ