AKP ភ្នំពេញ ថ្ងៃទី២៨ ខែវិច្ឆិកា ឆ្នាំ២០២៥ -- ក្រសួងពាណិជ្ជកម្មចិន បាននិយាយថា ប្រទេសចិនមានឆន្ទៈក្នុងការរក្សាទំនាក់ទំនងយ៉ាងជិតស្និទ្ធជាមួយសហរដ្ឋអាមេរិក និងធ្វើការងាររួមគ្នាដើម្បីធានាបាននូវការអនុវត្តលទ្ធផលនៃការពិគ្រោះយោបល់ផ្នែកសេដ្ឋកិច្ច និងពាណិជ្ជកម្មរបស់ពួកគេ។

លោកស្រី ហេ យ៉ុងគៀន (He Yongqian) អ្នកនាំពាក្យរបស់ក្រសួងពាណិជ្ជកម្ម បានធ្វើការកត់សម្គាល់ខាងលើនេះក្នុងការឆ្លើយតបទៅនឹងសំណួរមួយ ស្តីពីពាណិជ្ជកម្មសណ្តែកសៀងរបស់ប្រទេសចិនជាមួយសហរដ្ឋអាមេរិក នៅក្នុងសន្និសីទសារព័ត៌មានប្រចាំសប្តាហ៍មួយនៅទីក្រុងប៉េកាំង។

កាលពីថ្ងៃព្រហស្បតិ៍ម្សិលមិញនេះ លោកស្រី យ៉ាង ហ្វាន់ (Yang Fan) អ្នកនាំពាក្យរបស់ក្រុមប្រឹក្សាចិនសម្រាប់ការលើកកម្ពស់ពាណិជ្ជកម្មអន្តរជាតិ បាននិយាយថា តាមការអញ្ជើញរបស់សភាពាណិជ្ជកម្មសហរដ្ឋអាមេរិក ក្រុមប្រឹក្សានឹងរៀបចំគណៈប្រតិភូសហគ្រិនចិនមួយក្រុមដើម្បីទៅទស្សនកិច្ចនៅសហរដ្ឋអាមេរិកនៅដើមខែធ្នូខាងមុខនេះ។

ក្រុមហ៊ុនដែលចូលរួមនឹងតំណាងឱ្យវិស័យជាច្រើន រួមទាំងវិស័យកសិកម្ម គ្រឿងចក្រ និងអេឡិចត្រូនិច សេវាកម្មហិរញ្ញវត្ថុ ពាណិជ្ជកម្មឆ្លងដែន ភស្តុភារ និងដឹកជញ្ជូន ជីវឱសថ និងឧស្សាហកម្មវប្បធម៌ជាដើម។

លោកស្រី យ៉ាង បាននិយាយថា គណៈប្រតិភូនឹងចូលរួមយ៉ាងទូលំទូលាយជាមួយសហគមន៍នយោបាយ និងធុរកិច្ចរបស់សហរដ្ឋអាមេរិកនិងរៀបចំព្រឹត្តិការណ៍ផ្លាស់ប្តូរជាច្រើនរវាងថ្នាក់ដឹកនាំធុរកិច្ចចិន និងសហរដ្ឋអាមេរិក៕

ដោយ៖ យា ចិន្តាខន្តី (ប្រភព៖ ឆាយណាដេលី)