AKP ភ្នំពេញ ថ្ងៃទី២៨ ខែវិច្ឆិកា ឆ្នាំ២០២៥ -- នៅក្នុងកិច្ចប្រជុំកំពូលសហភាពអាហ្វ្រិក-អឺរ៉ុបលើកទី៧ ដែលបានធ្វើឡើងនៅទីក្រុងលូអាន់ដារបស់ប្រទេសអង់ហ្គោឡា បណ្តាមេដឹកនាំនៃសហភាពអាហ្វ្រិក និងសហភាពអឺរ៉ុប បានបញ្ជាក់សារជាថ្មីកាលពីពេលថ្មីៗនេះនូវការប្តេជ្ញាចិត្តរបស់ពួកគេក្នុងការពង្រឹងកិច្ចសហប្រតិបត្តិការសម្រាប់សន្តិភាព និងសន្តិសុខ ការអភិវឌ្ឍ សកម្មភាពអាកាសធាតុ និងការធ្វើចំណាកស្រុក។

នៅក្នុងពិធីបិទកិច្ចប្រជុំកំពូលដែលមានរយៈពេលពីរថ្ងៃនោះ ប្រធានសហភាពអាហ្វ្រិក និងជាប្រធានាធិបតីអង់ហ្គោឡា លោក ចូអៅ លូរេនកូ (Joao Lourenco) បាននិយាយថា កិច្ចពិភាក្សានៅក្នុងកិច្ចប្រជុំកំពូលនោះបានឆ្លុះបញ្ចាំងពីឆន្ទៈរួមគ្នាក្នុងការពង្រឹងកិច្ចសន្ទនា និងជំរុញកិច្ចសហប្រតិបត្តិការជាក់ស្តែងរវាងទ្វីបទាំងពីរ។

លោកស្រី យូស៊ូឡា​ វ៉ុន ដឺ ឡេយ៉េន (Ursula von der Leyen)ប្រធានគណៈកម្មការអឺរ៉ុប បាននិយាយថា គំនិតផ្តួចផ្តើម Global Gateway របស់សហភាពអឺរ៉ុប ដែលបានកៀរគរការវិនិយោគជាង ១២០ប៊ីលានអឺរ៉ូ(ប្រហែល ១៣៨,៨ប៊ីលានដុល្លារអាម៉េរិក) សម្រាប់ទ្វីបអាហ្វ្រិកចាប់តាំងពីការចាប់ផ្តើមរបស់ខ្លួនកាលពីបីឆ្នាំមុន ដោយមានគោលបំណងគាំទ្រដល់ការបង្កើតការងារក្នុងស្រុក ការអភិវឌ្ឍខ្សែសង្វាក់តម្លៃ និងឧស្សាហកម្មយុទ្ធសាស្ត្រ រួមទាំងការកែច្នៃវត្ថុធាតុដើម ការផលិតឱសថ និងការតភ្ជាប់ថាមពលក្នុងតំបន់។

យោងតាមសេចក្តីប្រកាសរួមនៃកិច្ចប្រជុំកំពូល បានឱ្យដឹងថា ភាគីទាំងពីរបានសង្កត់ធ្ងន់ទៅលើការគាំទ្រចំពោះពហុភាគីនិយម ការដោះស្រាយជម្លោះដោយសន្តិវិធី និងកិច្ចសហប្រតិបត្តិការកាន់តែរឹងមាំនៅក្នុងវិស័យនានា ដូចជាការប្រឆាំងអំពើភេរវកម្ម ការសម្របខ្លួនទៅនឹងអាកាសធាតុ ថាមពលបៃតង ការផ្លាស់ប្តូរឌីជីថល កសិកម្ម និងប្រព័ន្ធសុខាភិបាល។ ពួកគេក៏បានសន្យាថានឹងជំរុញការវិនិយោគ គាំទ្រដល់ឧស្សាហូបនីយកម្មរបស់ទ្វីបអាហ្វ្រិក បង្កើនការធ្វើសមាហរណកម្មក្នុងតំបន់និងអនុម័តវិធីសាស្រ្តដែលមានតុល្យភាពចំពោះការធ្វើចំណាកស្រុកដែលពង្រីកផ្លូវច្បាប់ ខណៈដែលដោះស្រាយលំហូរមិនទៀងទាត់ផងដែរ។

យន្តការតាមដានអចិន្ត្រៃយ៍មួយនឹងត្រូវបានបង្កើតឡើង ដើម្បីតាមដានការអនុវត្តការប្តេជ្ញាចិត្តនៃកិច្ចប្រជុំកំពូលនោះ៕

ដោយ៖ យា ចិន្តាខន្តី (ប្រភព៖ ឆាយណាដេលី)