AKP ភ្នំពេញ ថ្ងៃទី២៧ ខែវិច្ឆិកា ឆ្នាំ២០២៥ -- ក្រសួងការបរទេសកូរ៉េខាងត្បូងបាននិយាយថា អ្នកការទូតជាន់ខ្ពស់នៃប្រទេសកូរ៉េខាងត្បូង និងថៃបានព្រមព្រៀងគ្នាកាលពីថ្ងៃពុធ ដើម្បីពង្រីកកិច្ចសហប្រតិបត្តិការក្នុងវិស័យនិងឧស្សាហកម្មការពារជាតិ ដោយភាគីទាំងពីរសន្យាថានឹងធ្វើការយ៉ាងជិតស្និទ្ធដើម្បីដោះស្រាយឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធអ៊ីនធឺណិតផងដែរ។

ក្រសួងការបរទេសបាននិយាយថា អនុរដ្ឋមន្ត្រីការបរទេសទីមួយលោក ផាក យុនជូ (Park Yoon-joo) បានជួបជាមួយលោកស្រី អេកស៊ីរី ពីនតារូជី (Eksiri Pintaruchi) លេខាធិការអចិន្ត្រៃយ៍ទទួលបន្ទុកកិច្ចការបរទេសសម្រាប់កិច្ចសន្ទនាយុទ្ធសាស្ត្រទ្វេភាគី ដោយរដ្ឋមន្ត្រីទាំងពីរបានចែករំលែកការប្តេជ្ញាចិត្តរបស់ពួកគេក្នុងការបង្កើនភាពជាដៃគូ។

ដោយកត់សម្គាល់ពីវឌ្ឍនភាពជាលំដាប់នៃទំនាក់ទំនងទ្វេភាគីចាប់តាំងពីការចាប់ផ្តើមរដ្ឋាភិបាលថ្មីនៅក្នុងប្រទេសទាំងពីរ រដ្ឋមន្ត្រីទាំងពីរបានព្រមព្រៀងគ្នាជំរុញឱ្យមាន «កិច្ចសហប្រតិបត្តិការដែលផ្តោតលើអនាគត» ដែលអាចនាំមកនូវអត្ថប្រយោជន៍ជាក់ស្តែងដល់ប្រជាពលរដ្ឋរបស់ពួកគេ ដូចជានៅក្នុងវិស័យបញ្ញាសិប្បនិម្មិត និងការច្នៃប្រឌិតឌីជីថល។

ក្រសួងបាននិយាយថា «ពួកគេក៏បានព្រមព្រៀងគ្នាពង្រីកភាពជាដៃគូក្នុងវិស័យការពារជាតិ និងឧស្សាហកម្មការពារជាតិ និងស្វែងរកមធ្យោបាយធ្វើការរួមគ្នាក្នុងការដោះស្រាយឧក្រិដ្ឋកម្មឆ្លងដែន រួមទាំងការឆបោកតាមប្រព័ន្ធអ៊ីនធឺណិត និងបទល្មើសទាក់ទងនឹងគ្រឿងញៀន និងរក្សាការទំនាក់ទំនងយ៉ាងជិតស្និទ្ធ ដើម្បីពង្រឹងការសម្របសម្រួលអន្តរជាតិ រួមទាំងជាមួយវេទិកា ASEANAPOL»។

វេទិកា ASEANAPOL សំដៅទៅលើវេទិកាតំបន់សម្រាប់ភ្នាក់ងារអនុវត្តច្បាប់នៃសមាគមប្រជាជាតិអាស៊ីអាគ្នេយ៍ (អាស៊ាន) ដែលមានសមាជិកចំនួន ១១ប្រទេស ដើម្បីចែករំលែកព័ត៌មានស៊ើបការណ៍សម្ងាត់ និងធ្វើប្រតិបត្តិការរួមគ្នា។

ភាគីទាំងពីរក៏បានឯកភាពគ្នាលើសារៈសំខាន់នៃការបញ្ចប់ការចរចាដែលកំពុងបន្តលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយទ្វេភាគី (CEPA) និងប្តេជ្ញាធ្វើការរួមគ្នាឆ្ពោះទៅរកគោលដៅនេះ៕

ដោយ៖ មូល មិនា (ប្រភព៖ យ៉ុនហាប់)