AKP សៀមរាប ថ្ងៃទី២៥ ខែវិច្ឆិកា ឆ្នាំ២០២៥-- បន្ទាប់ពីបានជួបប្រជុំ និងពិភាក្សាគ្នាជាច្រើនប្រធានបទពាក់ព័ន្ធ និងការអភិឌ្ឍវិស័យទេសចរណ៍នៅកម្ពុជា នៅថ្ងៃទី២៥ ខែវិច្ឆិកា ឆ្នាំ២០២៥នេះ គណៈប្រតិភូនៃវេទិកាជាតិអេកូទេសចរណ៍ឆ្នាំ២០២៥ មកពីតាមបណ្តារាជធានីខេត្ត ទូទាំងប្រទេស បានធ្វើទស្សនកិច្ចសិក្សាឈ្វេងយល់ដោយផ្ទាល់ នៅសហគមន៍ទេសចរណ៍ធម្មជាតិកំពង់ឃ្លាំង ស្ថិតនៅស្រុកសូទ្រនិគម ខេត្តសៀមរាប។

លោក សរ៍ ប៊ុនចំរុង អនុប្រធានសហគមន៍ទេសចរណ៍ធម្មជាតិកំពង់ឃ្លាំង បានឱ្យដឹងថា សហគមន៍ទេសចរណ៍ធម្មជាតិកំពង់ឃ្លាំង មានទីតាំងស្ថិតនៅ ឃុំកំពង់ឃ្លាំង ស្រុកសូទ្រនិគម ដែលមានចំងាយប្រមាណជា៤៥គីឡូម៉ែត្រ ពីទីរួមខេត្តសៀមរាប។ សហគមន៍ទេសចរណ៍ធម្មជាតិកំពង់ឃ្លាំង ជារមណីយដ្ឋានទេសចរណ៍បែបធម្មជាតិនិងវប្បធម៌ នៅទីនេះមានសក្តានុពលទេសចរណ៍សំខាន់ៗ ដូចជាបឹងទន្លេ សាប អាហារធម្មជាតិ ព្រៃធម្មជាតិ។

នៅទីនេះ ភ្ញៀវទេសចរអាចមក ជិះទូក លំហែកម្សាន្ត ឈ្វេងយល់ពីជីវភាព រស់នៅរបស់ប្រជាជនក្នុងតំបន់ផងដែរ។ លោកបន្តថា ប្រជាពលរដ្ឋនៃឃុំនេះ ភាគច្រើនប្រកបរបរនេសាទត្រី និងកែច្នៃទិន្នផលត្រីទៅជាប្រហុក ត្រីងៀត ត្រីឆ្អើរជាដើម សម្រាប់ទ្រទ្រង់ជីវភាពប្រចាំថ្ងៃតជំនាន់។ នៅក្នុងឃុំកំពង់ឃ្លាំងនេះមានប្រជាពលរដ្ឋរស់នៅចំនួន១៨០០គ្រួសារ ក្នុងនោះប្រជាជនជាង៨៥%ប្រកបរបរនេសាទនិង១៥% ទៀតប្រកបរបរបន្ទាប់បន្សំដូចជាការចិញ្ចឹមត្រី ធ្វើចំការសណ្តែក កែច្នៃអនុផលនេសាទតាមរយៈការធ្វើផ្អក ប្រហុក ត្រីឆ្អើរ ត្រីងៀត និងអាជីវកម្មសេវាកម្មទេសចរណ៍។

លោកបានបន្តថា នៅក្នុងឃុំកំពង់ឃ្លាំងនេះ គឺមានសក្តានុពលទេសចរណ៍ជាច្រើនផងដែរ ដោយក្នុងនោះសហគមន៍ទេសចរណ៍ធម្មជាតិកំពង់ឃ្លាំង មានបម្រើសេវាកម្មដូចជាសេវាកម្មកាណូតទេសចរណ៍ ជិះទស្សនាថ្ងៃលិច -សេវាកម្មទូកអុំទស្សនាក្នុងភូមិ និងក្នុងព្រៃលិចទឹក -សេវាកម្មផ្ទះស្នាក់ ម្ហូបអាហារ និងភេសជ្ជៈ ជាពិសេសនោះ គឺវប្បធម៌ ទំនៀមទម្លាប់ ប្រពៃណី ការធ្វើផ្អក ប្រហុក ត្រីឆ្អើរនេះឯង ជាចំណែកទាក់ទាញ់ភ្ញៀវទេសចរដ៏សំខាន់។ នៅក្នុងដំណើរទស្សនកិច្ចនេះគណៈប្រតិភូក៏បានទៅទស្សនាសារៈមន្ទីរផ្ទះស្នាក់ និងតំបន់កម្សាន្តផ្សេងៗ៕

ដោយ ឃុត សៅ