AKP ភ្នំពេញ ថ្ងៃទី២៥ ខែវិច្ឆិកា ឆ្នាំ២០២៥ -- គិតត្រឹមព្រឹកថ្ងៃចន្ទម្សិលមិញនេះ មានមនុស្សសរុបចំនួន ១០.៩២២នាក់បានរងផលប៉ះពាល់ដោយគ្រោះទឹកជំនន់នៅទូទាំងរដ្ឋចំនួនប្រាំពីររបស់ប្រទេសម៉ាឡេស៊ី ដោយរដ្ឋកេឡាន់តាន់រងផលប៉ះពាល់ខ្លាំងជាងគេ។

រដ្ឋភាគឦសានបានរាយការណ៍ពីជនរងគ្រោះចំនួន ៨.២៤៨នាក់មកពី៣.០២២គ្រួសារកាលពីព្រឹកម្សិលមិញ ដែលជាការកើនឡើងគួរឱ្យកត់សម្គាល់ពីជនរងគ្រោះចំនួន ៧.៨៣០នាក់ដែលត្រូវបានរាយការណ៍កាលពីយប់ថ្ងៃអាទិត្យ។ នេះបើយោងតាមទីភ្នាក់ងារសារព័ត៌មានរដ្ឋBernama។

យោងតាមអាជ្ញាធរ បានឱ្យដឹងថា ស្ថានភាពនៅរដ្ឋកេឡាន់តាន់នៅតែធ្ងន់ធ្ងរ ដោយសារភ្លៀងធ្លាក់ខ្លាំងនៅតែបន្តនៅក្នុងតំបន់។

រដ្ឋផ្សេងៗទៀតក៏កំពុងដោះស្រាយជាមួយនឹងទឹកជំនន់ដែលកំពុងកើនឡើងផងដែរ។ នៅក្នុងរដ្ឋភ័រលីស ចំនួនជនរងគ្រោះបានកើនឡើងយ៉ាងខ្លាំងដល់ ៨១១នាក់មកពី ២៤៣គ្រួសារ បើប្រៀបធៀបទៅនឹងចំនួនជនរងគ្រោះ ១១៤នាក់មកពី ៣៥គ្រួសារដែលត្រូវបានរាយការណ៍កាលពីយប់ថ្ងៃអាទិត្យ។

នៅក្នុងរដ្ឋប៉េណាង ក៏បានឃើញមានការកើនឡើងនៃចំនួនជនរងគ្រោះដោយទឹកជំនន់ផងដែរ ដោយឈានដល់ ២៤២នាក់មកពី៥៧គ្រួសារ ខណៈដែលរដ្ឋប៉េរ៉ាក់ ក៏បានរាយការណ៍ពីការកើនឡើងនៃចំនួនជនរងគ្រោះដែរ ខណៈដែលរដ្ឋកេដាហ៍ និងរដ្ឋតេរេងហ្កានូ បានជួបប្រទះនូវការថយចុះនៃចំនួនជនរងគ្រោះដោយទឹកជំនន់ ដែលផ្តល់នូវភាពធូរស្រាលខ្លះក្នុងអំឡុងពេលវិបត្តិនេះ។

ទន្ទឹមនឹងនេះដែរ រដ្ឋសេឡាងហ្គោ បានក្លាយជារដ្ឋចុងក្រោយបង្អស់ដែលរងផលប៉ះពាល់ដោយគ្រោះទឹកជំនន់ ដោយបន្ថែមទៅក្នុងបញ្ជីតំបន់ដែលកំពុងត្រូវការការឆ្លើយតបជាបន្ទាន់ និងកិច្ចខិតខំប្រឹងប្រែងសង្គ្រោះ។

ដោយឡែក ការរអិលបាក់ដីកម្ពស់ ៦០ម៉ែត្របានវាយប្រហារតំបន់លំនៅដ្ឋានមួយក្នុងរដ្ឋធានីគូឡាឡាំពួរ ដោយបានកប់យានយន្ត និងបង្កឱ្យមានការជម្លៀសចេញនូវអង្គភាពលំនៅដ្ឋានចំនួន១០៤ ប៉ុន្តែមិនមានការរាយការណ៍អំពីអ្នកស្លាប់ និងរបួសនៅក្នុងហេតុការណ៍នោះទេ។ នេះបើយោងតាមរបាយការណ៍របស់សារព័ត៌មាន Malay Mail៕

ដោយ៖ យា ចិន្តាខន្តី (ប្រភព៖ AA-AKP)