AKP ភ្នំពេញ ថ្ងៃទី១៩ ខែវិច្ឆិកា ឆ្នាំ២០២៥-- ដើម្បីជំរុញការផ្សព្វផ្សាយយុទ្ធនាការ “ឆ្នាំទេសចរណ៍ កម្ពុជា-ចិន ២០២៥” ឱ្យបានកាន់តែទូលំទូលាយ ក្រសួងទេសចរណ៍ សហការជាមួយក្រសួង ស្ថាប័នពាក់ព័ន្ធ ផ្នែកឯកជន និងភាគីចិន នឹងរៀបចំ “វេទិកាផ្គូផ្គងធុរកិច្ចទេសចរណ៍អន្តរជាតិ កម្ពុជា-ចិន ឆ្នាំ២០២៥” ចាប់ពីថ្ងៃទី១៨ ដល់ថ្ងៃទី២០ ខែធ្នូ ឆ្នាំ២០២៥ នៅខេត្តសៀមរាប។ នេះបើតាមសេចក្តីជូនដំណឹងរបស់ក្រសួងទេសចរណ៍ជម្រាបជូនទៅដល់សមាគមទេសចរណ៍ ប្រតិបត្តិករទេសចរណ៍ ផ្នែកឯកជន អ្នកសារព័ត៌មាន ភ្ញៀវទេសចរជាតិ អន្តរជាតិ សាធារណជន និងភាគីពាក់ព័ន្ធនានា។

សេចក្តីជូនដំណឹងបានគូសបញ្ជាក់ថា វេទិកាផ្គូផ្គងធុរកិច្ចទេសចរណ៍អន្តរជាតិកម្ពុជា-ចិន ឆ្នាំ២០២៥ ជាកម្មវិធីទេសចរណ៍អន្តរជាតិមួយ ដែលនឹងផ្តល់ឱកាសនូវជំនួបធុរកិច្ចរវាងក្រុមហ៊ុនឯកជនផ្នែកទេសចរណ៍កម្ពុជា ជាមួយក្រុមហ៊ុនឯកជននៃប្រទេសចិនមកពីទីក្រុងសំខាន់ៗនៃប្រទេសចិន រួមមាន ទីក្រុងគ័ងចូវ ស៊ិនជិន គួយលីង សៀងហៃ ណាននីញ និងទីក្រុងដទៃទៀត រួមនិងក្រុមហ៊ុនឯកជននៃប្រទេសក្នុងតំបន់អាស៊ាន និងអន្តរជាតិ។ កម្មវិធីនេះនឹងមានការរៀបចំកម្មវិធីទស្សនកិច្ចសម្រាប់ប្រតិភូអ្នកទិញ (Buyers) អ្នកសារព័ត៌មាន និង Influencers ល្បីៗមកពីប្រទេសចិន ដើម្បីជំរុញការផ្សព្វផ្សាយសក្តានុពលទេសចរណ៍កម្ពុជាទៅកាន់ទីផ្សារចិន និងអន្តរជាតិឱ្យកាន់តែទូលំទូលាយ។

ក្នុងន័យនេះ ក្រសួងទេសចរណ៍ សូមអញ្ជើញសមាគមទេសចរណ៍ ប្រតិបត្តិករទេសចរណ៍ ផ្នែកឯកជន អ្នកសារព័ត៌មាន ភ្ញៀវទេសចរជាតិ អន្តរជាតិ សាធារណជន និងភាគីពាក់ព័ន្ធទាំងអស់ចូលរួមក្នុងវេទិកានេះឱ្យបានច្រើនកុះករ ដើម្បីបង្កើនការផ្សព្វផ្សាយកញ្ចប់ទស្សនកិច្ចទេសចរណ៍ កម្ពុជា-ចិន៕

ដោយ៖ ចាន់ សុភឿន (ប្រភព៖ ក្រសួងទេសចរណ៍)