AKP កំពង់ធំ ថ្ងៃទី១៩ ខែវិច្ឆិកា ឆ្នាំ២០២៥-- លោក សាយ គឹមឡម អភិបាលស្រុកស្ទោង បានជំរុញគ្រប់ភាគីពាក់ព័ន្ធសហការដើម្បីភ្ជាប់បណ្ដាញទឹកស្អាតជូនពលរដ្ឋបានប្រើប្រាស់គ្រប់ខ្នងផ្ទះ ក្នុងឱកាសអញ្ជើញជាអធិបតីភាពក្នុងអង្គសិក្ខាសាលាថ្នាក់ស្រុកប្រចាំឆ្នាំ២០២៦ ក្រោមកិច្ចសហការជាមួយអង្គការទស្សនពិភពលោកប្រចាំស្រុកស្ទោង នៅអគាររដ្ឋបាលស្រុកស្ទោង កាលពីថ្ងៃទី១៨ ខែវិច្ឆិកា ឆ្នាំ២០២៥។

លោក សាយ គឹមឡម បានបញ្ជាក់ថា អង្គការទស្សនៈពិភពលោកគឺជាដៃគូអភិវឌ្ឍដ៏មានសក្តានុពលបំផុតមួយក្នុងចំណោមដៃគូជាច្រើនទៀតក្នុងការលើកកម្ពស់ និងអភិវឌ្ឍមូលដ្ឋានជាច្រើនវិស័យដូចជាអប់រំ សុខភាព អនាម័យ កសិកម្មទឹកស្អាត ពិតជាបានរួមចំណែកយ៉ាងធំធេងបំផុតក្នុងការលើកកម្ពស់សុខុមាលភាពប្រជាពលរដ្ឋក្នុងស្រុកស្ទោង ឱ្យកាន់តែប្រសើរឡើងស្របតាមយុទ្ធសាស្ត្ររបស់រាជរដ្ឋាភិបាលអាណត្តិទី៧ ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

ជាមួយគ្នានេះលោកអភិបាលស្រុកបានលើកទឹកចិត្តដល់អាជ្ញាធរឃុំគ្រប់ឃុំត្រូវបង្កើនកិច្ចសហប្រតិបត្តិការឱ្យល្អថែមទៀតជាមួយអង្គការទស្សនៈពិភពលោកដៃគូអភិវឌ្ឍន៍នានា ក៏ដូចជារដ្ឋាករទឹកស្វ័យស្ទោងតាំងក្រសាំង ក្នុងការតភ្ជាប់បណ្ដាញទឹកស្អាត ជូនពលរដ្ឋបានប្រើប្រាស់ជាពិសេសពលរដ្ឋដែលមានបណ្ណសមធម៌ ឬបណ្ណក្រីក្រឱ្យអស់ពីលទ្ធភាព។

លោកបានកោតសរសើរ និងថ្លែងអំណរគុណយ៉ាងជ្រាលជ្រៅបំផុតដល់លោកស្រី ចាន់ សុផល និងសហការី តំណាងអង្គការទស្សនៈពិភពលោក ពិសេសប្រជាជននិងថ្នាក់ដឹកនាំនៃប្រទេសម៉ាឡេស៊ី ដែលជាអ្នកឧបត្ថម្ភគាំទ្រនូវមូលនិធិយ៉ាងច្រើនសន្ធឹកសន្ធាប់នូវគ្រឿងឧបភោគបរិភោគសម្ភារប្រើប្រាស់ដល់រដ្ឋបាលស្រុកស្ទោងសម្រាប់ធ្វើកិច្ចការមនុស្សធម៌ ជួយដល់ប្រជាពលរដ្ឋដែលងាយរងហានិភ័យនិងជួបឧបទ្ទវហេតុផ្សេងៗ។ក្នុងអង្គសិក្ខាសាលានេះបានប្រគល់ ទទួលនូវគ្រឿងឧបភោគបរិភោគមួយចំនួន រួមមាន មី១០០កេស ទឹកស៊ីអ៊ីវ១០០យួរ ប្រេងឆា១០០ដប និងត្រីខ១០០យួរផងដែរ៕

ដោយ ស៊ុម វណ្ណា