AKP សៀមរាប ថ្ងៃទី១៩ ខែវិច្ឆិកា ឆ្នាំ២០២៥-- គណៈប្រតិភូអន្តរក្រសួងរួមមានក្រសួងអភិវឌ្ឍន៍ជនបទ និងក្រសួងសេដ្ឋកិច្ចនិងហិរញ្ញវត្ថុ ដឹកនាំដោយឯកឧត្តម សាន វិសាល រដ្ឋលេខាធិការ និងជាសមាជិកគណៈកម្មាធិការលទ្ធកម្ម តំណាងឯកឧត្តមរដ្ឋមន្រ្តី ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានចុះត្រួតពិនិត្យ និងវាយតម្លៃលើការងារថែទាំផ្លូវក្រាលកៅស៊ូ DBST ចំនួន១៥ខ្សែ ដែលឆ្លងកាត់តាមបណ្តាស្រុកនានាចំនួន៨ស្រុក ស្ថិតក្នុងភូមិសាស្ត្រខេត្តសៀមរាប ដែលការចុះត្រួតពិនិត្យនេះ បានធ្វើឡើងនៅថ្ងៃទី១៨ ខែវិច្ឆិកា ឆ្នាំ២០២៥។

នៅក្នុងដំណើរចុះពិនិត្យនិងវាយតម្លៃផ្លូវនេះដែរ ឯកឧត្តម សាន វិសាល បានកោតសរសើរក្រុមការងារមន្ទីរអភិវឌ្ឍន៍ជនបទខេត្តសៀមរាប ដែលបានបំពេញការងារបានល្អក្នុងការចុះត្រួតពិនិត្យរាល់ការងារដែលក្រសួងប្រគល់អោយក្នុងការមើលថែទាំផ្លូវ ទាំងគុណភាព សោភណ្ឌភាព ព្រមទាំងបានណែនាំបន្ថែមដល់មន្ទីរ លើការងារបច្ចេកទេស ក្នុងការពង្រឹងការងារថែទាំផ្លូវផ្សេងៗទៀត ដោយត្រូវធ្វើអនាម័យសម្អាតស្មៅ ដើមឈើតូចៗ ដុះនៅអមសង្ខាងដងផ្លូវ  និងត្រូវជំរុញដល់អ្នកទទួលគម្រោងការថែទាំផ្លូវ ធ្វើការគូសគំនូសចរាចរណ៍ និង បំពាក់ស្លាកសញ្ញាចរាចរណ៍ឱ្យបានត្រឹមត្រូវតាមបច្ចេកទេស ទៅតាមកិច្ចសន្យាជាមួយក្រសួង។

គួរបញ្ចាក់ថា ផ្លូវក្រាលកៅស៊ូ DBST ទាំង១៥ខ្សែនោះ មានប្រវែង ១៧១ ៩២០ម៉ែត្រ ស្ថិតនៅក្នុងស្រុកជីក្រែង ស្រុកសូនិគម ស្រុកប្រាសាទបាគង ស្រុកស្រីស្នំ ស្រុកក្រឡាញ់ ស្រុកពួក ស្រុកអង្គរជុំ ស្រុកវ៉ារិន និងក្រុងសៀមរាបខេត្តសៀមរាប។ ហើយក្នុងចំណោមផ្លូវទាំង១៥ខ្សែនោះ មាន៤ខ្សែបានធ្វើការបំពាក់ស្លាកសញ្ញាចរាចរណ៍ និងគូសគំនូសចរាចរណ៍នៅតាមដងផ្លូវរួចរាល់ហើយ។ ហើយអត្តប្រយោជន៍នៃផ្លូវទាំង១៥ខ្សែនេះ វាបានជួយសម្រួលដល់ប្រជាពលរដ្ឋក្នុងមូលដ្ឋាន មានភាពងាយស្រួលទៅមក ក្នុងការធ្វើចរាចរណ៍ ការដឹកជញ្ជូនកសិផលរបស់ប្រជាពលរដ្ឋទៅកាន់ទីផ្សារ ជួយសម្រួលដល់សិស្សានុសិស្ស ធ្វើដំណើរទៅកាន់សាលារៀន និងដឹកជញ្ជូនអ្នកជំងឺមកកាន់មណ្ឌលសុខភាពបានទាន់ពេលវេលា៕

ដោយ ហង្ស សៀក