AKP ភ្នំពេញ ថ្ងៃទី១៨ ខែវិច្ឆិកា ឆ្នាំ២០២៥ -- ប្រធានាធិបតីកូរ៉េខាងត្បូង លោក លី ជែម្យុង (Lee Jae Myung) បានទៅដល់ទីក្រុងអាប៊ូដាប៊ី កាលពីថ្ងៃចន្ទ សម្រាប់ដំណើរទស្សនកិច្ចរយៈពេលបីថ្ងៃទៅកាន់ប្រទេសអេមីរ៉ាត់អារ៉ាប់រួម (UAE) ដែលជាទីចំណតដំបូងនៃដំណើរទស្សនកិច្ចបួនប្រទេសរបស់លោកនៅតំបន់មជ្ឈិមបូព៌ា និងអាហ្វ្រិក។

​យន្តហោះប្រធានាធិបតីរបស់លោក លី ត្រូវបានអមដំណើរដោយយន្តហោះចម្បាំងរបស់កងទ័ពអាកាស UAE ចំនួនបួនគ្រឿង នៅពេលដែលវាបានចូលទៅក្នុងដែនអាកាសរបស់ប្រទេសនេះ ក្នុងពិធីស្វាគមន៍សម្រាប់ដំណើរទស្សនកិច្ចផ្លូវរដ្ឋរបស់លោក។

​នៅថ្ងៃដំបូង លោក លី បានទៅទស្សនាផ្នូររបស់ប្រធានាធិបតីស្ថាបនិកUAE គឺលោក ហ្សាយ៉េដ ប៊ីន ស៊ុលតង់ អាល់ ណាយ៉ាន់ (Zayed bin Sultan Al Nahyan) និងជួបជាមួយប្រជាជនកូរ៉េខាងត្បូងនៅទីនោះ។

​នៅថ្ងៃអង្គារនេះ លោកនឹងធ្វើកិច្ចពិភាក្សាកំពូលជាមួយប្រធានាធិបតីUAE លោក ម៉ូហាំម៉េដ ប៊ីន ហ្សាយ៉េដ អាល់ ណាយ៉ាន់ (Mohammed bin Zayed Al Nahyan) និងចុះហត្ថលេខាលើអនុស្សរណៈនៃការយោគយល់គ្នា ដើម្បីពង្រីកកិច្ចសហប្រតិបត្តិការក្នុងវិស័យនានា រួមទាំងវិស័យបញ្ញាសិប្បនិម្មិត (AI) និងឧស្សាហកម្មការពារជាតិ។

​នៅថ្ងៃបន្ទាប់ លោក លី ត្រូវបានគ្រោងនឹងចូលរួមកិច្ចពិភាក្សាតុមូលអាជីវកម្ម ដើម្បីពិភាក្សាអំពីវិធីពង្រឹងកិច្ចសហប្រតិបត្តិការរវាងសហគមន៍អាជីវកម្មរបស់ប្រទេសទាំងពីរ។ លោក លី ជេ-យ៉ុង (Lee Jae-yong)នាយកប្រតិបត្តិក្រុមហ៊ុនអេឡិចត្រូនិចសាំស៊ុង និងលោក គីម ដុង-ក្វាន់ (Kim Dong-kwan) អនុប្រធានក្រុមហ៊ុនហាន់វ៉ា ត្រូវបានគេរាយការណ៍ថានឹងចូលរួមក្នុងកិច្ចពិភាក្សាតុមូលនោះដែរ។

​លោកក៏មានគម្រោងទៅទស្សនកិច្ចអង្គភាព Akh ដែលជាកងយោធាកូរ៉េខាងត្បូងដែលឈរជើងនៅ UAE ដើម្បីលើកទឹកចិត្តកងទ័ព។

​ដំណើរទស្សនកិច្ចទៅកាន់ UAE នេះ គឺជាការចាប់ផ្តើមនៃដំណើរទស្សនកិច្ចរយៈពេល ១០ថ្ងៃរបស់លោកទៅកាន់ប្រទេសចំនួនបួន ដែលនឹងរួមបញ្ចូលទាំងប្រទេសអាហ្វ្រិកខាងត្បូងផងដែរ ជាកន្លែងដែលលោកនឹងចូលរួមកិច្ចប្រជុំកំពូល G20 ក៏ដូចជាដំណើរទស្សនកិច្ចទៅកាន់ប្រទេសអេហ្ស៊ីប និងតួកគី។

​នេះជាដំណើរទស្សនកិច្ចលើកដំបូងរបស់លោក លី ទៅកាន់តំបន់មជ្ឈិមបូព៌ា ចាប់តាំងពីលោកឡើងកាន់តំណែងកាលពីខែមិថុនា។ UAE គឺជាប្រទេសមជ្ឈិមបូព៌ាតែមួយគត់ ដែលបានបង្កើតភាពជាដៃគូយុទ្ធសាស្ត្រពិសេសជាមួយកូរ៉េខាងត្បូង៕

ដោយ៖ យា ចិន្តាខន្តី (ប្រភព៖ កូរ៉េថាមស៍)