AKP ភ្នំពេញ ថ្ងៃទី១៨ ខែវិច្ឆិកា ឆ្នាំ២០២៥ -- អាជ្ញាធរមូលដ្ឋាននៃទីក្រុងស្ស៊ូមែន ក្នុងប្រទេសប៊ុលហ្គារី និងទីក្រុងអាយវ៉ាលីក ក្នុងប្រទេសតួកគី បានពិភាក្សាគ្នាអំពីឱកាសសម្រាប់កិច្ចសហប្រតិបត្តិការសេដ្ឋកិច្ច និងវប្បធម៌ក្នុងអំឡុងពេលនៃកិច្ចប្រជុំមួយនៅទីក្រុងស្ស៊ូមែន។ នេះបើយោងតាមរបាយការណ៍របស់រដ្ឋាភិបាលក្រុងកាលពីថ្ងៃអាទិត្យ។ គណៈប្រតិភូមកពីទីក្រុងអាយវ៉ាលីក (ខេត្តបាលីកេសឺ នៅភាគពាយ័ព្យនៃប្រទេសតួកគី) ត្រូវបានដឹកនាំដោយអភិបាលក្រុង លោក មេស៊ុត អឺគីន (Mesut Ergin)។

​លោក រីស្តូ អ៊ីវ៉ាណូវ (Hristo Ivanov) អភិបាលក្រុងស្ស៊ូមែន បានជម្រាប់ជូនគណៈប្រតិភូភ្ញៀវថា ចំណុចខ្លាំងចម្បងរបស់ទីក្រុងរបស់លោកគឺថាវាមានល្បឿនលើសពីមជ្ឈមណ្ឌលទីក្រុងប៊ុលហ្គារីធំៗមួយចំនួនទាក់ទងនឹងកំណើនសេដ្ឋកិច្ច។ លោក អ៊ីវ៉ាណូវ បាននិយាយថា សាជីវកម្មធំៗ រួមទាំងអង្គភាពមកពីប្រទេសតួកគីផង កំពុងដំណើរការអាជីវកម្មដ៏ជោគជ័យយ៉ាងខ្លាំងនៅក្នុងទីក្រុងស្ស៊ូមែន។ លោកបានបន្ថែមថា «យើងនឹងរក្សាទំនាក់ទំនងដ៏ល្អឥតខ្ចោះនេះ»។

​ម្ចាស់ផ្ទះបានកត់សម្គាល់ថា មានសួនឧស្សាហកម្មមួយនៅក្នុងតំបន់នេះដែលកម្មសិទ្ធិរបស់វាត្រូវបានបែងចែក ៤០/៦០ រវាងទៅក្រុង និងវិនិយោគិនឯកជន។ លោក អ៊ីវ៉ាណូវ បាននិយាយថា «ការអភិវឌ្ឍដ៏ជោគជ័យនៃភាពជាដៃគូរវាងរដ្ឋ និងឯកជន បាននាំឱ្យបណ្តាក្រុមហ៊ុនជាច្រើនមកកាន់ទីក្រុងរបស់យើង ដែលមានឥទ្ធិពលវិជ្ជមានទៅលើសេដ្ឋកិច្ចក្រុង និងតំបន់»។លោកបានបញ្ជាក់ពីការពិតដែលថា ទីក្រុងស្ស៊ូមែន ដែលជាកន្លែងប្រវត្តិសាស្ត្រ វិមានវប្បធម៌ និងទីតាំងធម្មជាតិដ៏គួរឱ្យកត់សម្គាល់បានឃើញនូវការកើនឡើង ១២% នៃវិស័យទេសចរណ៍ក្នុងរយៈពេលពីរឆ្នាំចុងក្រោយនេះ។

​សេចក្តីប្រកាសព័ត៌មានមួយរបស់ទីក្រុងបាននិយាយថា ទីក្រុងស្ស៊ូមែនក៏រក្សាទំនាក់ទំនងយ៉ាងជិតស្និទ្ធជាមួយទីក្រុងដទៃទៀតរបស់ប្រទេសតួកគីផងដែរ។

​លោក មេស៊ុត អឺគីន អភិបាលក្រុងបានចង្អុលបង្ហាញថា ទីក្រុងអាយវ៉ាលីក ត្រូវបានគេស្គាល់ដោយសារការផលិតប្រេងអូលីវ និងពិធីបុណ្យម្ហូបអាហារ ដែលបំផុសគំនិតដោយម្ហូបក្នុងស្រុកដ៏សម្បូរបែប។ វាមានចម្ងាយនៃការធ្វើដំណើររយៈពេលបីម៉ោងពីទីក្រុងអ៊ីស្តង់ប៊ុល ដែលធ្វើឱ្យវាក្លាយជាកន្លែងដែលមានអ្នកទៅទស្សនាច្រើន។ លោក អឺគីន បាននិយាយថា តំបន់នេះមានការវិនិយោគអាជីវកម្មជាច្រើនទៅលើស្ពាន និងហេដ្ឋារចនាសម្ព័ន្ធផ្សេងៗទៀត។

​លោក អឺគីន បាននិយាយថា ទីក្រុងអាយវ៉ាលីក បានចាប់ផ្តើមសាងសង់តំបន់ឧស្សាហកម្មថ្មីមួយ ដែលនឹងមានជំនាញខាងឧស្សាហកម្មម្ហូបអាហារ។ យោងតាមលោក អ៊ីវ៉ាណូវ បានឱ្យដឹងថា ការសាងសង់កន្លែងស្រដៀងគ្នានេះសម្រាប់វិស័យម្ហូបអាហារ គឺស្ថិតនៅក្នុងរបៀបវារៈរបស់រដ្ឋាភិបាលមូលដ្ឋាននៅក្នុងទីក្រុងស្ស៊ូមែន។

​អភិបាលក្រុងទាំងពីរបានឯកភាពគ្នាទៅលើទំនាក់ទំនងទ្វេភាគីក្នុងវិស័យវប្បធម៌។

​យោងតាមការប៉ាន់ស្មានពីឆ្នាំ២០២៤ ទីក្រុងស្ស៊ូមែន និងទីក្រុងអាយវ៉ាលីក មានទំហំស្រដៀងគ្នាទាក់ទងនឹងចំនួនប្រជាជន គឺ ៦៧.០០០នាក់ និង៧៥.០០០នាក់រៀងៗគ្នា៕

ដោយ៖ យា ចិន្តាខន្តី (ប្រភព៖ BTA)