AKP ភ្នំពេញ ថ្ងៃទី១៧ ខែវិច្ឆិកា ឆ្នាំ២០២៥ -- រដ្ឋមន្ត្រីការបរទេសហុងគ្រីលោក ភែតទ័រ អេសហ្ស៊ីជចាតូ (Peter Szijjarto) បាននិយាយថារដ្ឋាភិបាលហុងគ្រីនឹងរារាំងដល់សេចក្តីសម្រេចណាមួយរបស់សហភាពអឺរ៉ុបដែលមានគោលបំណងបង្កើនជម្លោះប្រដាប់អាវុធនៅអ៊ុយក្រែន និងការចូលរួមរបស់ប្រទេសអឺរ៉ុបនៅក្នុងសង្គ្រាមនោះ។

​អ្នកការទូតកំពូលរបស់ហុងគ្រីរូបនោះបាននិយាយថា «ប្រសិនបើទីក្រុងប្រ៊ុចសែលជំរុញយើងឱ្យធ្វើសង្គ្រាម យើងនឹងប្រើសិទ្ធិវេតូរបស់យើងប្រឆាំងនឹងសេចក្តីសម្រេចនោះ បើទោះបីជាយើងត្រូវធ្វើសកម្មភាពតែម្នាក់ឯងប្រឆាំងនឹងប្រទេសចំនួន២៦ [សហភាពអឺរ៉ុប] ផ្សេងទៀតក៏ដោយ»។

​លោកបានសង្កត់ធ្ងន់ថា «យើងមិនអាចអនុញ្ញាតឱ្យហុងគ្រី និងប្រជាជនហុងគ្រីចូលរួមក្នុងសង្គ្រាមបានទេ។ យើងត្រូវតែការពារហុងគ្រី និងពលរដ្ឋហុងគ្រីពីសង្រ្គាម»៕

ដោយ៖ យា ចិន្តាខន្តី (ប្រភព៖ តាសស៍)